16 شىلدەدە وزبەكستان پرەزيدەنتى شاۆكات ميرزيوەۆتىڭ جارلىعى كۇشىنە ەنىپ، ونىڭ ۇلكەن قىزى سايدا ميرزيوەۆاعا – پرەزيدەنت اكىمشىلىگىنىڭ جاڭادان تاعايىندالعان باسشىسىنا بىرقاتار جاڭا وكىلەتتىكتەر بەرىلدى، دەپ حابارلايدى "ادىرنا" ۇلتتىق پورتالى.
جارلىققا سايكەس، سايدا ميرزيوەۆا جەرگىلىكتى جانە شەتەلدىك ساراپشىلاردى دامۋ جوبالارىنا تىكەلەي كەلىسىمشارت نەگىزىندە جۇمىسقا تارتا الادى جانە ولاردىڭ جالاقىسىن ۇلتتىق نە شەتەل ۆاليۋتاسىندا بەلگىلەۋ قۇقىعىنا يە. بۇل مامانداردىڭ ەڭبەكاقىسى پرەزيدەنت اكىمشىلىگىنىڭ قىزمەتىن قولداۋ قورىنان تولەنەدى.
سونىمەن قاتار، ونىڭ قۇزىرەتىنە:
اكىمشىلىك قىزمەتكەرلەرىنىڭ شتات كەستەسىن بەكىتۋ;
پرەزيدەنت كەڭەسشىلەرى مەن قۇرىلىمدىق بولىمشە باسشىلارىنىڭ ورىنباسارلارىن تاعايىنداۋ جانە بوساتۋ;
بۇعان دەيىن پرەزيدەنت بەكىتكەن كەيبىر لاۋازىمدى تۇلعالاردى تاعايىنداۋ نەمەسە قىزمەتتەن بوساتۋ ەنەدى.
بۇدان بولەك، سايدا ميرزيوەۆا ەكى اپتا ىشىندە پرەزيدەنت اكىمشىلىگىنىڭ باسقارۋشى قۇرامىن اتتەستاتسيادان وتكىزىپ، ولاردىڭ جۇمىسىن باعالاۋى كەرەك. سونداي-اق ول جوعارى الەۋەتى بار كادرلاردى ىرىكتەۋدى قولعا الادى.
ال مەملەكەت باسشىسىنىڭ كەڭەسشىلەرى مەن قۇرىلىمدىق بولىمشە جەتەكشىلەرى ون كۇن ىشىندە ءوز باعىتتارى بويىنشا دامۋ جوبالارىنىڭ ءتىزىمىن جاساپ، سايدا ميرزيوەۆانىڭ بەكىتۋىنە ۇسىنۋى ءتيىس. كوممۋنيكاتسيالار دەپارتامەنتى ءبىر اي ىشىندە مەملەكەتتىك كوممۋنيكاتسيالىق ستراتەگيا ازىرلەۋى قاجەت.
ەسكە سالا كەتسەك، 2023 جىلى بۇل لاۋازىم جويىلعان بولاتىن. الايدا 2025 جىلدىڭ ماۋسىم ايىندا سايدا ميرزيوەۆا پرەزيدەنت اكىمشىلىگىنىڭ باسشىسى بولىپ قايتا تاعايىندالدى. ول بۇعان دەيىن اكەسىنىڭ كومەكشىسى قىزمەتىن اتقارعان.
