ۇلتتىق بانك توراعاسى تيمۋر سۇلەيمەنوۆ تەڭگە باعامىنىڭ نە سەبەپتى قۇبىلاتىنىن ايتتى، دەپ حابارلايدى «ادىرنا» ءتىلشىسى.
ول ەلىمىزدىڭ 2015 جىلدان باستاپ ينفلياتسيالىق تارگەتتەۋ جانە ەركىن وزگەرمەلى ايىرباس باعامى رەجيمىنە وتكەنىن مالىمدەدى.
«بۇل يكەمدى، زاماناۋي جانە تۇراقتى ەكونوميكالىق مودەلگە قاراي جاسالعان تۇبەگەيلى ماڭىزدى قادام بولدى. قازىر تەڭگە باعامى ۆاليۋتا نارىعىنداعى سۇرانىس پەن ۇسىنىستىڭ اسەرىنەن قالىپتاسۋدا. سونداي-اق ول ەكونوميكاداعى نارىقتىق پروتسەستەردىڭ، ىشكى جانە سىرتقى فاكتورلاردىڭ كورىنىسى بولىپ وتىر. بۇرىن مەملەكەت باعامدى اكىمشىلىك جولمەن بەلگىلەۋى تەڭگەنىڭ كۇرت ءارى ءبىر ساتتىك دەۆالۆاتسياسىنا الىپ كەلەتىن»،—دەدى توراعا.
سۇلەيمەنوۆتىڭ ايتۋىنشا، قازىر ەكونوميكاعا قۇيىلىپ جاتقان فيسكالدىق قاراجات كولەمى ۇلعايعان. اقشا ماسساسى ءبىر جىل ىشىندە 18%-عا وسكەن. الايدا ىشكى ءوندىرىس بۇل وسىمگە ىلەسە الماي وتىر.
«ەگەر ەكونوميكاعا سالىناتىن اقشا كولەمى ىشكى وندىرىسكە قاراعاندا تەز وسسە، بۇل يمپورتتىڭ ارتۋىنا اكەلىپ سوعادى. بيىل ايتارلىقتاي شىعىستار، سونىڭ ىشىندە ينفراقۇرىلىمدىق جانە الەۋمەتتىك جوبالارعا اقشالار قاراستىرىلعان. ناتيجەسىندە ءىرى كەلىسىمشارتتار جاسالىپ، قاراجاتتى يگەرۋ ءۇشىن يمپورتتىق جابدىقتار، تەحنيكا، كومپونەنتتەر ساتىپ الىنادى. بۇل شەتەل ۆاليۋتاسىنا دەگەن جوعارى سۇرانىستى قالىپتاستىرىپ، تەڭگە باعامىنا قىسىم جاسايدى»،—دەپ ءتۇسىندىردى ول.
توراعانىڭ ايتۋىنشا، ۋاقىت وتە كەلە وتاندىق تاۋار ءوندىرىسى اقشا ماسساسىنىڭ كولەمىنە سايكەس دەڭگەيگە جەتەدى, بىراق ول ءۇشىن، ارينە، ۋاقىت قاجەت.
«قازىرگى جاعدايدا ەكونوميكانىڭ يمپورتقا جۇگىنۋىنە تۋرا كەلىپ وتىر»،–دەدى سۇلەيمەنوۆ.
ول سونداي-اق رەتتەۋشى ورگان نارىقتاعى جاعدايدى مۇقيات باقىلاپ وتىرعانىن جانە باعامنىڭ كۇرت قۇبىلۋى مەن الىپساتارلىق ارەكەتتەر بولعان جاعدايدا شۇعىل ارەكەت ەتۋگە دايىن ەكەنىن اتاپ ءوتتى.
ايتا كەتەيىك، 26 شىلدەدە اقشا ايىرباستاۋ ورىندارىندا دوللار 550 تەڭگەگە جاقىندادى
