باكۋ ماسكەۋدەن Azerbaijan Airlines اۋە كومپانياسىنا تيەسىلى Embraer 190 ۇشاعىنىڭ اپاتقا ۇشىراۋىنا بايلانىستى جاۋاپكەرشىلىكتى ءوز موينىنا الۋدى كۇتەدى. بۇل تۋرالى ازەربايجان پرەزيدەنتىنىڭ كومەكشىسى حيكمەت گادجيەۆ ايتتى، دەپ حابارلايدى «ادىرنا» ءتىلشىسى.
ول ەكى ەل اراسىنداعى قارىم-قاتىناستا تۇبەگەيلى وزگەرىستەر بولماعانىن، دەگەنمەن، سوڭعى ايلاردا بەلگىلى ءبىر تۇسىنىسپەۋشىلىكتەر مەن ەكىجاقتى قاتىناستا شيەلەنىستىڭ كۇشەيگەنى بايقالاتىنىن مالىمدەدى.
«بارلىعى اۆياكاتاستروفادان باستالدى. ۇشاق اپاتى ازەربايجان قوعامىن تەرەڭ كۇيزەلتتى. ول رەسەي اۋماعىندا، رەسەيدىڭ اۋە كەڭىستىگىندە بولدى. وقيعانىڭ ءمان-جايىن ءبىز جاقسى بىلەمىز. بۇل ەندى قۇپيا ەمەس. ازەربايجان كورشى ءارى سەرىكتەس ەل رەتىندە رەسەي بۇل ءىستى موينىنا الىپ، ادىلەتتىلىكتى قامتاماسىز ەتەدى دەپ كۇتەدى»، - دەدى پرەزيدەنت كومەكشىسى.
ەسكە سالايىق، AZAL اۋە كومپانياسىنىڭ جولاۋشىلار ۇشاعى 25 جەلتوقساندا اقتاۋ قالاسىنا جاقىن ماڭدا اپاتقا ۇشىراعان ەدى. ۇشاق بورتىندا بولعان 67 ادامنىڭ 38-ءى قازا تاۋىپ، 29-ى امان قالدى. الدىن الا مالىمەتتەر بويىنشا، ۇشاق رەسەيدىڭ اۋە كەڭىستىگىندە، گروزنىي قالاسىنىڭ ۇستىندە سىرتقى فيزيكالىق جانە تەحنيكالىق اسەردىڭ سالدارىنان اپاتقا ۇشىراعان.
