اقتوبەدە مەشىت ىشىندە قىزعا «بىررەتتىك نەكە» ۇسىنىپ، ادەپسىز سوزدەر ايتقان ەر ادام ۇستالدى، دەپ حابارلايدى «ادىرنا» ءتىلشىسى.
وقيعا 25 شىلدە كۇنى «نۇر عاسىر» مەشىتىندە بولعان. بەلگىسىز ەر ادام قىزدىڭ جولىن بوگەپ، ونىڭ مەشىتتەن شىعۋىنا كەدەرگى جاساعان. اتالعان وقيعا ۆيدەوعا ءتۇسىرىلىپ، الەۋمەتتىك جەلىلەردە جاريالاندى.
اقتوبە وبلىسى پوليتسيا دەپارتامەنتى قىزمەتكەرلەرى جۇرگىزگەن جەدەل-ىزدەستىرۋ شارالارى ناتيجەسىندە ەر ادامنىڭ جەكە باسى انىقتالدى. ءمان-جايدى انىقتاۋ ءۇشىن ول ىشكى ىستەر ورگاندارىنا جەتكىزىلدى.
«قۇقىقبۇزۋشىمەن پروفيلاكتيكالىق اڭگىمە جۇرگىزىلدى. وعان مۇنداي ارەكەتتەرگە جول بەرمەۋ كەرەكتىگى جونىندە قولدانىستاعى زاڭناما تالاپتارى ءتۇسىندىرىلدى. سونىمەن قاتار قر اقبتك-ءنىڭ 449-بابى 2-بولىگىنە (قوعامدىق ورىندا ءتيىسۋ) سايكەس اكىمشىلىك حاتتاما تولتىرىلدى. ماتەريال سوتقا جىبەرىلەتىن بولادى»،—دەپ ءتۇسىندىردى ءىىم ءباسپاسوز قىزمەتى.
ەسكە سالايىق، بۇعان دەيىن اقتوبەلىك بلوگەر ەممانۋەللا ناۋرىزباەۆا مەشىتتە قولايسىز جاعدايعا تاپ بولعانىن ايتقان ەدى.
