بۇگىن — قازاقستاننىڭ ەكى بىردەي عارىشكەرى، ەل ماقتانىشتارى توقتار اۋباكىروۆ پەن ايدىن ايىمبەتوۆتىڭ تۋعان كۇنى.
سوۆەت وداعىنىڭ باتىرى، كسرو ۇشقىش-عارىشكەرى، الەمدەگى 259-شى استروناۆت، قازاقستاننىڭ حالىق قاھارمانى توقتار اۋباكىروۆ بيىل 79 جاسقا تولىپ وتىر.
ول 1946 جىلى 27 شىلدەدە قاراعاندى وبلىسىنىڭ قارقارالى اۋدانىندا دۇنيەگە كەلگەن. تاۋەلسىز قازاقستاننىڭ عارىشقا جول اشقان العاشقى قادامى دا ءدال وسى ازاماتتىڭ ەسىمىمەن تىعىز بايلانىستى. توقتار وڭعاربايۇلى 1991 جىلى 2 قازاندا بايقوڭىر عارىش ايلاعىنان «سويۋز تم-13» كەمەسىمەن كوككە كوتەرىلىپ، 7 كۇن 22 ساعات 12 مينۋت عارىشتا بولىپ، عىلىمي زەرتتەۋ جۇمىستارىن ءساتتى ورىندادى. ول بيوتەحنولوگيا، مەتاللۋرگيا، مەديتسينا جانە ارال تەڭىزى ايماعىنا قاتىستى زەرتتەۋلەر جۇرگىزىپ، عارىشتىق عىلىمعا زور ۇلەس قوستى.
ال الەمدەگى 545-ءىنشى استروناۆت، قازاقستاننىڭ تۇڭعىش عارىشكەرى، حالىق قاھارمانى ايدىن ايىمبەتوۆ بۇگىن 53 جاسقا تولدى.
ول 1972 جىلى 27 شىلدەدە الماتى وبلىسى تالدىقورعان قالاسىنا قاراستى وتەناي اۋىلىندا دۇنيەگە كەلگەن. ايدىن اقانۇلى 2015 جىلدىڭ قىركۇيەگىندە «سويۋز تما-18م» كەمەسىنىڭ بورتينجەنەرى رەتىندە عارىشقا ساپار شەكتى. ول حالىقارالىق عارىش ستانتسياسىندا 10 كۇن بويى بولىپ، قازاقستاننىڭ 5-ءشى ۇلتتىق عىلىمي باعدارلاماسىن ورىندادى. بۇل زەرتتەۋلەر قازاقستاننىڭ عارىشتىق عىلىمداعى تاۋەلسىز باعىتتاعى قادامدارىنىڭ جالعاسى بولدى.
ايتا كەتۋ كەرەك، توقتار اۋباكىروۆ پەن ايدىن ايىمبەتوۆتىڭ ءومىر جولىندا ورتاق پاراللەلدەر كوپ. ەكەۋى دە ارماۆير جوعارى اسكەري اۆياتسيا ۇشقىشتار ۋچيليششەسىن ءتامامداپ، سىناقشى-ۇشقىش رەتىندە قىزمەت اتقارعان، كەيىن عارىشكەر مارتەبەسىنە يە بولدى.
