الماتى وبلىسىنداعى سوربۇلاق سۋ قويماسى ماڭىندا 25 شىلدەدە جوعالعان EC-145 اسكەري تىكۇشاعىن ىزدەۋ جۇمىستارى تاۋلىك بويى توقتاۋسىز جالعاسۋدا، دەپ حابارلايدى "ادىرنا" ۇلتتىق پورتالى قورعانىس مينيسترلىگىنە سىلتەمە جاساپ.
ىزدەۋ-قۇتقارۋ وپەراتسياسىنا 400-گە جۋىق ادام، ونىڭ ىشىندە قۇتقارۋشىلار، اسكەري قىزمەتكەرلەر، پوليتسيا قىزمەتكەرلەرى، سۇڭگۋىرلەر جانە كينولوگتار جۇمىلدىرىلعان.
سونداي-اق 70-تەن استام جەرۇستى تەحنيكاسى، 21 ءجۇزۋ قۇرالى، 10 درون، ەحولوتتار، سۋ استى سكانەرلەۋ قۇرىلعىلارى مەن يتتەرمەن جۇمىس ىستەيتىن توپتار جۇمىس ىستەۋدە.
«وپەراتسياعا 400-گە جۋىق ادام، 70-تەن استام تەحنيكا، 21 قايىق، 10 ۇشقىشسىز اپپارات، ەحولوت جانە سۋ استىن سكانەرلەيتىن قۇرىلعىلار تارتىلدى. جەرگىلىكتى جەردە وپەراتسيانى قر قارۋلى كۇشتەرى اۋە كۇشتەرىنىڭ قولباسشىسى، اۆياتسيا گەنەرال-مايورى اسقار ىزباسوۆ باسقارىپ وتىر. ول بارلىق بولىمشەلەردىڭ جۇمىسىن ۇيلەستىرىپ وتىر»، - دەلىنگەن قورعانىس مينيسترلىگىنىڭ رەسمي حابارلاماسىندا.
ماماندار تەك سۋ ايدىنىن عانا ەمەس، جاعالاۋداعى تەرەڭ ءارى قيىن جەتەتىن اۋماقتاردى دا تەكسەرىپ جاتىر. مينيسترلىك مالىمەتىنشە، جوعالعان ەكيپاج مۇشەلەرىنىڭ تۋىستارىمەن بايلانىس ۇزدىكسىز جۇرگىزىلۋدە.
ىزدەۋ جۇمىستارىنا قيىن تابيعي جانە تەحنوگەندىك جاعدايلار كەدەرگى بولىپ جاتقانى ايتىلدى. سۋ قويماسىنىڭ ءتۇبى لايعا تولى بولعاندىقتان كورىنبەۋدە. كەي جەرلەردەگى تەرەڭدىك 22 مەترگە دەيىن جەتەدى.
قورعانىس مينيسترلىگى وپەراتسيا تىكۇشاق بورتىنداعى بارلىق ادام تابىلعانشا جالعاساتىنىن مالىمدەدى.
ەسكە سالايىق، الماتى وبلىسىندا EC-145 اسكەري تىكۇشاعى جوعالىپ كەتتى. بورتتا ءۇش ەكيپاج مۇشەسى بولعان. ەكيپاجى مۇشەلەرىنىڭ تۋىستارى پرەزيدەنتتەن، توتەنشە جاعداي جانە قورعانىس مينيسترلەرىنەن ىزدەۋ وپەراتسياسىن جەكە باقىلاۋلارىنا الۋدى سۇراعانى تۋرالى جازعان ەدىك.
