الماتى وبلىسىنداعى سوربۇلاق ماڭىندا جوعالعان اسكەري تىكۇشاق ءتورت كۇننەن بەرى تابىلمادى. بۇل تۋرالى قورعانىس مينيسترلىگى مالىمدەدى, دەپ حابارلايدى “ادىرنا”.
اقپاراتقا سايكەس، قورعانىس مينيسترلىگى باسقا دا وڭىرلەرلەر قوسىمشا كۇش-قۇرالدار جەتكىزۋگە ءماجبۇر بولعان.
EC-145 تىكۇشاعى 25 شىلدەدە لۋگوۆويدان ۇشىپ شىعىپ، راداردان جوعالىپ كەتتى. ونىڭ بورتىندا ەكيپاجدىڭ ءۇش مۇشەسى بولعان.
اسكەري تىكۇشاقتىڭ قالدىقتارى سوربۇلاق سۋ قويماسى اۋماعىنان تابىلعان. سول سەبەپتى ىزدەۋ جۇمىستارى ءدال وسى جەردە ءجۇرىپ جاتىر.
قورعانىس مينيسترلىگىنىڭ مالىمەتىنشە، كۇنى بويى وپەراتسيا جۇرگىزىلەتىن اۋدانعا باسقا وڭىرلەردەن قوسىمشا كۇش-قۇرالدار جەتكىزىلدى. قوناەۆ قالاسىنان ىزدەۋ بولىمشەسى، وعان قوسا اقتاۋ قالاسىنان ا-400 اسكەري-كولىك ۇشاعىمەن جەتكىزىلگەن جەكە قۇرام مەن تەحنيكا وسىندا الدىرىلدى. قۇرامىندا سۋ ايدىنىنىڭ جەتۋ قيىن ۋچاسكەلەرىن زەرتتەۋگە ارنالعان سۇڭگۋىرلىك جابدىقتار، ەحولوتتار، كاتەر مەن قايىق تا بار.
وپەراتسيالارعا قوسىمشا بەس اسكەري ءبولىمنىڭ كۇش-قۇرالدارى تارتىلدى. جۇمىس تاۋلىك بويى جالعاسىپ جاتىر. ىزدەۋ شارالارى بارىسىندا تىكۇشاقتىڭ قالدىقتارى تابىلعان. قازىر ولاردى انىقتاۋ جۇمىستارى ءجۇرىپ جاتىر.
سوربۇلاق – تمد اۋماعىنداعى ەڭ ءىرى قولدان جاسالعان سۋ قويمالارىنىڭ ءبىرى. ونىڭ تەرەڭدىگى 22 مەترگە جەتەدى. تابانى لاي.
«ماماندار اكۆاتوريانى عانا ەمەس، جاعالاۋدى دا تەكسەرىپ ءجۇر. تەرەڭ، قيىن جەرلەردى دە. ىزدەۋ جۇمىستارى كۇنى-ءتۇنى توقتاۋسىز ءجۇرىپ جاتىر. وپەراتسيانى اسكەري اۋە كۇشتەرىنىڭ قولباسشىسى گەنەرال-مايور اسقار ءىزباسوۆ باسقارادى. ول سول جەردە ءجۇر»، – دەپ حابارلادى قورعانىس مينيسترلىگى.
جوعالعان تىكۇشاق ەكيپاجىنىڭ وتباسى مۇشەلەرى دە وسىندا ءجۇر. ولارعا ناقتى اقپارات جەتكىزىلىپ تۇرادى. 28 شىلدەدە ولار ىزدەۋ اۋماعىن اۋەدەن باقىلادى. الەۋمەتتىك جەلىلەردە جاريالانعان ۆيدەولاردا جوعالعان ازاماتتاردىڭ تۋىستارى ىزدەۋ جۇمىستارى توقتاۋسىز ءجۇرىپ جاتقانىن ايتتى.
قورعانىس مينيسترلىگىنىڭ مالىمدەۋىنشە، قۇتقارۋ-ىزدەۋ وپەراتسياسى تۇپكىلىكتى ناتيجە شىققانعا دەيىن جالعاسادى.
