«نەمولچيKZ» قورىنىڭ جەتەكشىسى دينا ءتاڭسارى مەن ونىڭ جۇبايى المات مۇحامەدجانوۆ ەكەۋى چەرنوگوريادان ساياسي باسپانا الدى. بۇل تۋرالى وتباسىنا باسىنان باستاپ قولداۋ كورسەتىپ كەلە جاتقان «ازاماتتىق اليانس» ۇيىمى ايتتى، دەپ حابارلايدى "ادىرنا"
«وسىلايشا ۇزاق ءارى كۇردەلى پروتسەسس اياقتالىپ، ەندى دينا سمايلوۆا مەن المات مۇحامەدجانوۆ چەرنوگوريادا، قاۋىپسىز ورتادا ومىرلەرىن جالعاستىرا الادى»، — دەپ جازدى ۇيىم وكىلدەرى.
باسپانا الۋ پروتسەسى شامامەن ەكى جىلعا سوزىلعان.
2024 جىلدىڭ ءساۋىر ايىندا سمايلوۆا قازاقستاننىڭ سۇرانىسى بويىنشا چەرنوگوريادا ۇستالدى. وعان ەلىمىزدە التى بىردەي قىلمىستىق ءىس بويىنشا ايىپ تاعىلعان.
الايدا ەرتەسىنە-اق پودگوريتسا سوتى بەلسەندىنى بوساتىپ، ونىڭ تولقۇجاتىن الىپ قويىپ، ەكستراديتسيالاۋ پروتسەسىن باسپانا بەرۋ تۋرالى ءوتىنىشى قارالعانعا دەيىن توقتاتتى.
سمايلوۆانىڭ ءوزى تاعىلعان ايىپتاردى جوققا شىعاردى. دينا بۇل ايىپتاردى ساياسي استارى بار، قۋدالاۋ دەپ ەسەپتەيدى.
جۋرناليستەرگە بەرگەن سۇحباتىندا ول بۇل قىلمىستىق ىستەردىڭ قولدان ۇيىمداستىرىلعانىن جانە تىكەلەي ءوزى باسقاراتىن، ايەلدەرگە قاتىستى زورلىق-زومبىلىقپەن كۇرەسەتىن، پوليتسيانىڭ جابىرلەنۋشىلەر وتىنىشىنە نەمقۇرايلى قاراۋىنا قارسى باعىتتالعان قور جۇمىسىنا بايلانىستى ەكەنىن ايتقان.
دينا وتباسىمەن بىرگە قازاقستاننان 2021 جىلى كەتكەن. الدىمەن گرۋزياعا كوشىپ بارعان. بىراق بۇل ەل وعان 2023 جىلى ەلگە كىرۋگە تىيىم سالعاننان كەيىن، چەرنوگورياعا قونىس اۋدارعان.
جەرگىلىكتى قۇقىق قورعاۋ جانە ايەلدەر ۇيىمدارى سمايلوۆانى ەكستراديتسيالاماۋعا جانە وعان باسپانا بەرۋگە شاقىرىپ، اشىق ۇندەۋ جاريالاعان.
اقىرىندا چەرنوگوريا بيلىگى ولاردىڭ تالابىن ەسكەرىپ، ساياسي باسپانا بەرۋ تۋرالى شەشىم شىعاردى.
