الماتى وبلىسىندا تالعار اۋدانىنا قاراستى پانفيلوۆ اۋىلدىق وكرۋگىنىڭ اكىمى دۋلات داۋلەتاليەۆ قاتىسقان جول اپاتى ورىن الدى. وقيعا سالدارىنان ءبىر ادام كوز جۇمدى، ال اكىم مەن تاعى ءبىر جولاۋشى جاراقات الىپ، اۋرۋحاناعا جەتكىزىلدى، دەپ حابارلايدى “ادىرنا”.
الەۋمەتتىك جەلىلەردە تاراعان مالىمەتكە سايكەس، اكىم قىزمەتتىك كولىكپەن رايىمبەك اۋدانىنداعى تاۋلى ايماققا بارا جاتقان كەزدە رولگە يە بولا الماي، كولىك جولدان شىعىپ كەتكەن. سالدارىنان اۆتوكولىك بىرنەشە رەت اۋدارىلىپ، 38 جاستاعى جولاۋشى وقيعا ورنىندا قازا تاپقان.
اكىم مەن تاعى ءبىر جولاۋشى اۋىر جاراقاتتارمەن اۋرۋحاناعا جەتكىزىلگەن.
تالعار اۋدانى اكىمىنىڭ اپپاراتىندا دۋلات داۋلەتاليەۆتىڭ جول اپاتىنا ۇشىراعانىن راستادى. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلىپ جاتىر.
اۋدان اكىمدىگى وكىلدەرىنىڭ ايتۋىنشا، اكىم اۋرۋحانادا ەم قابىلداپ جاتقاندىقتان، ازىرگە قىزمەتتىك تەكسەرىس جۇرگىزۋ مۇمكىن ەمەس.
«پروتسەسسۋالدىق ارەكەتتەر اياقتالعان سوڭ جانە مەملەكەتتىك قىزمەتكەر جۇمىسقا شىققاننان كەيىن، تارتىپتىك شارا قولدانۋ ماسەلەسى ەتيكا كەڭەسىندە قارالادى»، — دەپ مالىمدەدى اكىمدىك.
الماتى وبلىستىق پوليتسيا دەپارتامەنتىنىڭ حابارلاۋىنشا، جول اپاتى 13 قىركۇيەكتە قاراساز – سارىجاز اۆتوجولىندا بولعان.
“Bestune T55 ماركالى كولىكتىڭ جۇرگىزۋشىسى رولگە يە بولا الماي، كولىك اۋدارىلىپ كەتكەن»، — دەلىنگەن وبلىستىق پد حابارلاماسىندا.
پوليتسيا قاجەتتى ساراپتامالاردى تاعايىنداپ، وقيعانىڭ بارلىق ءمان-جايىن انىقتاۋ ءۇشىن تەرگەۋ جۇرگىزىپ جاتىر. ءىس دەپارتامەنت باسشىلىعىنىڭ باقىلاۋىندا.
