حالىقارالىق قىلمىستىق سوتتىڭ (حقس) پروكۋرور ورىنباسارلارى ناجات شاميم حان جانە مام مانديا نيانگ ۋكرايناداعى اسكەري قىلمىستارعا بايلانىستى رەسەي پرەزيدەنتى ۆلاديمير پۋتينگە جانە تاعى بەس رەسەيلىككە شىعارىلعان تۇتقىنداۋ وردەرلەرى جالپى امنيستيا جاريالانعان كۇننىڭ وزىندە دە كۇشىندە قالا بەرەتىنىن مالىمدەدى. بۇل تۋرالى ولار 5 جەلتوقساندا مالىمدەدى، دەپ حابارلايدى "ادىرنا".
حقس وكىلدەرىنىڭ ايتۋىنشا، تۇتقىنداۋ وردەرلەرىنىڭ كۇشىن توقتاتۋ ءۇشىن بۇۇ قاۋىپسىزدىك كەڭەسىنىڭ ارنايى قارارى قاجەت. ەگەر بولاشاقتا بەيبىت كەلىسىم جاسالىپ، قاۋىپسىزدىك كەڭەسى تەرگەۋدى كەيىنگە قالدىرۋدى سۇراسا، بۇل ساياسي دەڭگەيدەگى ۇدەرىس سانالادى. دەگەنمەن سوت وكىلدەرى مۇنداي شەشىم حقس-ءتىڭ ادىلدىكتى قامتاماسىز ەتۋ مىندەتىنە كەدەرگى بولمايتىنىن اتاپ ءوتتى.
مام مانديا نيانگ ريم ستاتۋتىنىڭ تالاپتارى ساياسي كەلىسىمدەردەن جوعارى تۇرعانىن، سوندىقتان سوت ءوز مانداتىن ورىنداۋدى جالعاستىراتىنىن ايتتى.
اقش-تىڭ 28 تارماقتان تۇراتىن بەيبىت جوسپارى قاقتىعىسقا قاتىسقان بارلىق تاراپقا تولىق امنيستيا بەرۋدى كوزدەگەن. بۇل ۇسىنىس ۋكراينا تاراپىنان قاتتى سىنعا ۇشىرادى.
ۋكراينانىڭ نيدەرلاندتاعى ەلشىسى، بۇرىنعى باس پروكۋرور اندرەي كوستين جاپپاي جانە اۋىر قىلمىستار جاسالعان جاعدايدا بارىنە بىردەي راقىمشىلىق بەرۋ مۇمكىن ەمەس ەكەنىن ايتتى. ول مۇنداي قادام ادىلەتتىلىككە قايشى كەلەتىنىن جەتكىزدى.
حقس 2022 جىلى رەسەيدىڭ ۋكرايناعا جاپپاي باسىپ كىرۋىنەن كەيىن جاسالعان اسكەري قىلمىستار بويىنشا ۆلاديمير پۋتين مەن ونىڭ جاقىن اينالاسىنداعى تاعى بەس ادامعا وردەر شىعاردى.
ۋكراينا بيلىگىنىڭ مالىمەتىنشە، 2022 جىلدان بەرى رەسەيگە 19,5 مىڭنان استام ۋكراين بالاسى زاڭسىز اكەتىلگەن. ولاردىڭ 1605-ءى عانا ەلگە قايتارىلعان. بالالاردى وككۋپاتسيالانعان ايماقتاردان رەسەيگە اكەلۋ پۋتين مەن رەسەيدىڭ بالا قۇقىقتارى جونىندەگى ومبۋدسمەنى ماريا لۆوۆا-بەلوۆاعا قاتىستى وردەرلەردىڭ باستى سەبەبى بولدى.
رەسەي بيلىگى بۇل ايىپتاۋلاردى جوققا شىعارىپ، بالالار ەۆاكۋاتسيا ماقساتىندا اكەتىلگەنىن مالىمدەدى. سونىمەن قاتار رەسەي حالىقارالىق قىلمىستىق سوتتىڭ يۋريسديكتسياسىن مويىندامايدى.
