الماتىدا لگبت ناسيحاتىنا تىيىم سالاتىن زاڭدى قولداۋ بويىنشا كونفەرەنتسيا ءوتتى. ءىس-شاراعا قۇقىق قورعاۋشىلار، زاڭگەرلەر مەن قوعام بەلسەندىلەرى قاتىستى.
قۇقىق قورعاۋشى باعيلا بالتاباەۆانىڭ ايتۋىنشا، زاڭ جوباسى لگبت وكىلدەرىنىڭ قۇقىقتارىنا نۇقسان كەلتىرۋدى كوزدەمەيدى، كەرىسىنشە، وسكەلەڭ ۇرپاقتىڭ ساناسىنا تەرىس اسەر ەتەتىن اقپارات پەن كونتەنتتەن بالالارىمىزدى قورعاۋعا باعىتتالعان.
«زاڭ نورمالارىن پىسىقتاۋ كەزىندە ءبىر جىل بويى ارنايى زەرتتەۋ جۇرگىزىلدى. ونىڭ ناتيجەسى حالىقتىڭ 85%-ى لگبت ناسيحاتىنا قارسى ەكەنىن كورسەتتى. كەز-كەلگەن مەملەكەت ءوزىنىڭ ۇلتتىق جانە وتباسىلىق قۇندىلىقتارىن قورعاۋى كەرەك. بۇل زاڭ حالىقارالىق نورمالارعا قايشى كەلمەيدى»، – دەيدى بالتاباەۆا.
ءوز كەزەگىندە زاڭگەر باعدات اماندوسۇلى بۇل زاڭ جوباسى قازاقستاننىڭ ۇلتتىق قاۋىپسىزدىگى ماسەلەسىمەن تىكەلەي بايلانىستى ەكەنىن اتاپ ءوتتى.
«بۇل زاڭ جوباسى ءبىزدىڭ مۇددەلەرىمىزگە سايكەس كەلەدى جانە ۇلتتىق قۇندىلىقتاردى قورعاۋعا باعىتتالعان»، – دەدى ول.
كونفەرەنتسياعا قاتىسۋشىلار جاھاندانۋ داۋىرىندە بالالار ءۇشىن نەگىزگى اقپارات كوزى ينتەرنەت ەكەنىن اتاپ ءوتتى. زەرتتەۋلەر كورسەتكەندەي، قازاقستاندىق جاسوسپىرىمدەر كوبىنە جاسىنا سايكەس كەلمەيتىن 18+ كونتەنتكە تاپ بولادى ەكەن.
«وتباسى – قوعامنىڭ ىرگەتاسى. ءدال قازىر قوعامداعى وتباسى ينستيتۋتىن نىعايتۋ اسا ماڭىزدى، ال لگبت ناسيحاتى ءبىزدىڭ حالقىمىزدىڭ قۇندىلىقتارى ءۇشىن قاۋىپتى. مەملەكەت قارقىندى دامىپ كەلەدى، قوعام الدەقايدا سانالى بولا باستادى. اتا-انالار بالالارى ءۇشىن جاقسى ءومىردى قالايتىنى بەلگىلى. تاربيە وتباسىنان باستالادى، ءداستۇرلى قۇندىلىقتاردى ۇرپاقتان – ۇرپاققا بەرۋ ماڭىزدى»، – دەپ اتاپ ءوتتى «التىن القا» مەدالىنىڭ يەگەرى، «قازاق انالارى – داستۇرگە جول» رقۇ الماتى فيليالىنىڭ باسشىسى ءلايلا داۋلەت.
قاتىسۋشىلاردىڭ پىكىرىنشە، قازىر قازاقستاندا بالالاردى زياندى اقپاراتتان قورعاۋعا باعىتتالعان زاڭدار بار، الايدا «لگبت-ءنى ناسيحاتتاۋ» ۇعىمى ناقتى انىقتالماعان. ۇسىنىلعان تۇزەتۋلەر بۇل ولقىلىقتىڭ ورنىن تولتىرىپ، بارلىق سالالىق زاڭداردا بىركەلكى نورمالاردىڭ بولۋىن قامتاماسىز ەتەدى.
ەستەرىڭىزگە سالا كەتەيىك، بىلتىر قازاقستاندا «لگبت ناسيحاتىنا» تىيىم سالۋدى تالاپ ەتەتىن پەتيتسيا جاريالانىپ، شەشىم قابىلداۋعا قاجەتتى 50 مىڭ قول جينالعان بولاتىن. وسىدان كەيىن زاڭ شىعارۋشى ورگاننىڭ دەپۋتاتتارى لگبت ناسيحاتىنا تىيىم سالۋ تۋرالى باستاما كوتەردى. بيىل 12 قاراشادا پارلامەنت ءماجىلىسى ەكىنشى وقىلىمدا بۇل زاڭدى ماقۇلدادى. ەندى ونى سەنات قارايتىن بولادى.
