استانادا ابىلاي حان داڭعىلىنداعى تۇرعىن ۇيلەردىڭ بىرىندە بولعان ءورت سالدارىنان 11 جاستاعى قىز قازا تاپتى، دەپ حابارلايدى "ادىرنا" ۇلتتىق پورتالى كتك-عا سىلتەپ.
تۇرعىن ۇيلەردىڭ بىرىندە كىشكەنتاي بالانىڭ پودەزگە سىرىڭكە تاستاپ، سىرتقا شىعىپ كەتكەنى بەينەباقىلاۋعا تۇسكەن. سالدارىنان ءورت شىعىپ، ءبىر ادام قازا تاپتى. ال قۇتقارۋشىلار تۇتىنگە تولى پودەزدەن 50-گە جۋىق ادامدى ەۆاكۋاتسيالاعان. ونىڭ ىشىندە جەتى بالا بار.
وقيعا كۋاگەرلەرىنىڭ ايتۋىنشا، كەيبىر تۇرعىندار تۇتىنگە تۇنشىعىپ، ەسىنەن تانىپ قالعان. ال اجە مەن بالالار قاۋىپتەن قاشىپ، بيىكتىكتەن سەكىرىپ، الاڭعا قۇلاعان. قازىر ءتورت بالا اۋرۋحانادا، ال اجە كومادا جاتىر.
بارلىق زارداپ شەككەندەر كومىرقىشقىل گازىنان ۋلانىپ، اۋرۋحاناعا جەتكىزىلگەن. 2014 جىلى تۋعان ءبىر بالانىڭ جاعدايى اسا اۋىر بولدى. دارىگەرلەر قولدان كەلگەن كومەكتى كورسەتكەنىمەن، ونىڭ ءومىرىن ساقتاپ قالۋ مۇمكىن بولماعان.
استانا قالاسى قوعامدىق دەنساۋلىق ساقتاۋ باسقارماسىنىڭ ءباسپاسوز حاتشىسى اقبايان اراپشاەۆانىڭ مالىمەتىنشە، قازىرگى تاڭدا ءۇش بالانىڭ جاعدايى جاقسارىپ، ولار ءتيىستى بولىمشەلەرگە اۋىستىرىلىپ جاتىر. ءبىر بالانىڭ جاعدايى ءالى دە اۋىر، ال ءبىر ەرەسەك ادامنىڭ جاعدايى تۇراقتالىپ كەلەدى.
وقيعانىڭ ناقتى سەبەبى انىقتالىپ جاتىر، ءتيىستى ورگاندار تەرگەۋ جۇمىستارىن باستادى.
