قازاقستانداعى مۇناي ءوندىرۋ كولەمى كاسپي قۇبىر كونسورتسيۋمىنىڭ قارا تەڭىزدەگى اسا ماڭىزدى ەكسپورتتىق ايلاعىنداعى ۇزاققا سوزىلعان جوندەۋ جۇمىستارىنا بايلانىستى قىسقارۋى مۇمكىن. بۇل تۋرالى Bloomberg اگەنتتىگى جازدى، دەپ حابارلايدى «ادىرنا» ءتىلشىسى.
قازىرگى ۋاقىتتا نوۆوروسسيسك پورتىنداعى كقك تەرمينالىندا ءۇش قوندىرعىنىڭ تەك ءبىرى عانا جۇمىس ىستەپ تۇر. ءبىر ايلاق قاراشا ايىنىڭ سوڭىندا ۋكراين دروندارىنىڭ شابۋىلىنان قاتتى زاقىمدانسا، ەكىنشىسى سول كەزدە جوسپارلى جوندەۋدەن ءوتىپ جاتقان.
“تولىق ەكسپورت كولەمىن ساقتاۋ ءۇشىن كەمىندە ەكى ايلاقتىڭ جۇمىس ىستەۋى قاجەت. سونىڭ سالدارىنان قويمالاردا مۇناي قورى كوبەيە باستادى”،- دەپ جازدى اگەنتتىك.
باستاپقىدا دروندار زيان كەلتىرمەگەن ايلاقتاعى تەحنيكالىق جۇمىستار 11 جەلتوقساندا اياقتالادى دەپ جوسپارلانعان. كەيىن مەرزىم 13 جەلتوقسانعا اۋىستىرىلدى. الايدا Bloomberg دەرەككوزدەرىنىڭ مالىمەتىنشە، جوندەۋ جۇمىستارى 15 جەلتوقسانعا دەيىن سوزىلماق.
“جاعداي وزگەرمەسە، قويمالار تولىپ، قازاقستان مۇناي ءوندىرۋدى قىسقارتۋعا ءماجبۇر بولۋى مۇمكىن”،- دەپ حابارلاعان دەرەككوزدەر.
قازاقستاننىڭ ەنەرگەتيكا مينيسترلىگى دە، كقك باسشىلىعى دا ازىرگە رەسمي تۇسىنىكتەمە بەرگەن جوق.
كاسپي قۇبىر كونسورتسيۋمى قازاقستاننىڭ مۇناي ەكسپورتىنىڭ شامامەن 80 پايىزىن قامتاماسىز ەتەدى. ونىڭ ىشىندە Chevron, ExxonMobil, Shell سەكىلدى ءىرى كومپانيالاردىڭ مۇنايى دا وسى باعىتپەن ەكسپورتتالادى.
قاراشا ايىندا كقك-نىڭ نوۆوروسسيسكىدەگى تەرمينالى بىرنەشە رەت شابۋىلعا ۇشىرادى، ونىڭ ەڭ اۋىر سالدارى ايدىڭ سوڭىندا تىركەلدى. بۇل — قازاقستاننىڭ ەڭ ءىرى مۇناي كەن ورىندارىنان مۇناي ەكسپورتتايتىن نەگىزگى ارنا. كونسورتسيۋم ارقىلى بەلگىلى ءبىر كولەمدە رەسەيلىك مۇناي دا تاسىمالدانادى. Bloomberg مالىمەتىنشە، قاراشادا شابۋىلدار سالدارىنان كقك ارقىلى جەتكىزىلىمدەر قازان ايىمەن سالىستىرعاندا تاۋلىگىنە شامامەن 155 مىڭ باررەلگە ازايعان.
بۇعان قوسا، Reuters اگەنتتىگى قازاقستان جەلتوقسان ايىندا العاش رەت قاشاعان مۇنايىنىڭ شامامەن 50 مىڭ تونناسىن قىتايعا اتاسۋ–الاشانكوۋ قۇبىرى ارقىلى جونەلتۋدى جوسپارلاپ وتىرعانىن حابارلادى. بۇل كولەم كاسپي قۇبىر كونسورتسيۋمى جۇيەسىنەن قايتا باعىتتالماق.
