بريتاندىق «Vertical Aerospace» اەروكوسموستىق كومپانياسى 2028 جىلى لوندوندا اەروتاكسي قىزمەتىن ىسكە قوسپاق. بۇل تۋرالى Independent گازەتى جازدى، دەپ حابارلايدى «ادىرنا» ءتىلشىسى.
«Valo دەپ اتالاتىن اەروتاكسي التى جولاۋشىعا دەيىن تاسىمالداي الادى جانە 100 ميلگە (شامامەن 160 كم) دەيىنگى قاشىقتىقتى 150 ميل/ساع (شامامەن 257 كم/ساع) جىلدامدىقپەن باعىندىرۋعا قابىلەتتى. جوباعا رەتتەۋشى ورگانداردىڭ رۇقساتى الداعى ءۇش جىلدا بەرىلەدى دەپ كۇتىلۋدە»،-دەلىنگەن حابارلامادا.
باستاپقىدا «ۇشاتىن تاكسيلەر» اۋەجايلار مەن ءىرى قالالار باعىتىندا قاتىنايدى. كومپانيا وكىلدەرىنىڭ ايتۋىنشا، العاشىندا بۇل قىزمەت پرەميۋم دەڭگەيىندە بولادى، الايدا ءوندىرىس كولەمى ارتقان سايىن باعاسى دا قولجەتىمدى بولىپ، قاراپايىم تاكسي تاريفتەرىمەن شامالاس بولۋى مۇمكىن.
ەسكە سالايىق، بۇعان دەيىن كولىك ءمينيسترى نۇرلان ساۋرانباەۆ ەلىمىزدە اەروتاكسي 2027 جىلى ىسكە قوسىلۋى ابدەن مۇمكىن ەكەنىن جەتكىزگەن ەدى.
