يران باسشىلىعى ۆاشينگتونمەن كەلىسىمگە كەلمەي، يادرولىق زىمىران باعدارلامالارىن جالعاستىراتىن بولسا، اقش ەلگە قايتا سوققى جاساۋى مۇمكىن. بۇل تۋرالى اق ءۇي باسشىسى دونالد ترامپ مالىمدەدى، دەپ حابارلايدى «ادىرنا» ءتىلشىسى Report-قا سىلتەمە جاساپ.
ترامپتىڭ ايتۋىنشا، اقش قارۋلى كۇشتەرى فوردو، ناتانز جانە يسفاحان قالالارىنداعى يراننىڭ يادرولىق نىساندارىنا سوققى جاساماعاندا، تاياۋ شىعىستاعى جاعدايدى رەتتەۋ مۇمكىن بولماس ەدى.
«يران ءوز يادرولىق باعدارلاماسىن قايتا جالعاستىرىپ كورۋى مۇمكىن. قالپىنا كەلتىرۋ جۇمىستارىنا كوپ ۋاقىت كەرەك بولادى، بىراق بۇل ەل بىزبەن مامىلەگە كەلمەي، باعدارلامانى قايتا جاندىرعىسى كەلسە، ءبىز ونى تولىق جويامىز. ءبىز ولاردىڭ زىمىراندارىن دا وتە تەز جويىپ جىبەرە الامىز»،- دەدى اقش پرەزيدەنتى.
قاراشا ايىنىڭ باسىندا يراننىڭ سىرتقى ىستەر ءمينيسترى ابباس اراگچي Al Jazeera تەلەارناسىنا بەرگەن سۇحباتىندا ەل باسشىلىعى ۋراندى بەيبىت ماقساتتا بايىتۋدى جالعاستىراتىنىن جانە يادرولىق باعدارلامانىڭ بولاشاعىن تالقىلاۋ مۇمكىن ەمەستىگىن مالىمدەگەن. ول ەشبىر اقىل-ەسى دۇرىس ادامنىڭ ونىڭ اسكەري كومپونەنتىنەن باس تارتپايتىنىن اتاپ وتكەن.
ەسكە سالايىق، 13 ماۋسىمعا قاراعان ءتۇنى يزرايل يرانعا اسكەري وپەراتسيا باستاعان بولاتىگ. ءبىر تاۋلىك وتپەي جاتىپ، يران جاۋاپ سوققىسىن جاسادى. اقش 9 كۇن وتكەن سوڭ ۋشىققان قاقتىعىسقا ارالاسىپ، فوردو، ناتانز جانە يسفاحان قالالارىنداعى يراننىڭ يادرولىق نىساندارىنا سوققى بەردى.
23 ماۋسىم كەشىندە يران تاياۋ شىعىستاعى ەڭ ءىرى امەريكالىق اسكەري بازا — كاتارداعى ءال-ۋدەيد اۋە بازاسىنا شابۋىل جاسادى. وسىدان كەيىن اقش پرەزيدەنتى دونالد ترامپ يزرايل مەن يراننىڭ بىتىمگە كەلگەنىن جاريالادى. ءبىتىم 24 ماۋسىمدا كۇشىنە ەندى.
