تيمۋر قۇلىباەۆتىڭ Halyk قايىرىمدىلىق قورىنىڭ «اۋىل سپورت – 2025» جوباسىنىڭ جەڭىمپازدارى حالىقارالىق ارەناعا شىعىپ، ەل قورجىنىنا بىردەن ەكى بىردەي التىن سالدى.
2026 جىلعى 25–29 ناۋرىز ارالىعىندا تۇركيانىڭ انتاليا وڭىرىندەگى سيدە قالاسىندا وتكەن «Antalya Volleyball Friendship Cup U-16» حالىقارالىق جاستار تۋرنيرىندە قازاقستاننىڭ جاس سپورتشىلارى تاريحي جەتىستىككە قول جەتكىزدى.
بۇل دودادا جەتىسۋ وبلىسى، اقسۋ اۋدانى، جانسۇگىروۆ اۋىلىنىڭ قىزدار كومانداسى مەن الماتى وبلىسى، ىلە اۋدانى، وتەگەن باتىر اۋىلىنىڭ ۇلدار كومانداسى قازاقستان نامىسىن قورعادى. اۋىلدان شىققان قاراپايىم بالالاردىڭ قاجىرلى ەڭبەگى، تاباندىلىعى مەن جىگەرى ولاردى ۇلكەن جەڭىسكە جەتكىزدى.
Halyk قورى جارىسقا دەيىنگى دايىندىق كەزەڭنى دە جوعارى دەڭگەيدە ۇيىمداستىردى. قىزدار كومانداسى الماتىداعى كاسىبي ۆولەيبول ورتالىعىندا جاتتىعىپ، تەحنيكالىق جانە تاكتيكالىق شەبەرلىگىن جەتىلدىرسە، ۇلدار كومانداسى بالقاش اۋدانىنىڭ باقاناس اۋىلىندا وقۋ-جاتتىعۋ جيىندارىن وتكىزىپ، فيزيكالىق دايىندىعىن شىڭدادى. بۇل دايىندىق ولاردىڭ ءار ويىندا سەنىمدى، جيناقى جانە جىگەرلى ونەر كورسەتۋىنە نەگىز بولدى.
«بالالار ءبىز ويلاعاننان دا جاقسى وينادى. Halykقايىرىمدىلىق قورى ءبىزدىڭ بارلىق شىعىندى - وقۋ-جاتتىعۋ جيىنى، جاتىن ورىن، تاماقتى تولەدى. اۋىل بالالارىنا بۇل - ۇلكەن مۇمكىندىك. ءبىزدىڭ بالالارعا مۇنداي تاجىريبە سىيلاعانى ءۇشىن قورعا العىس ايتامىز!» - دەيدى باپكەر عالىم عاينول.
تۋرنير بارىسىندا قازاقستاندىق كوماندالار قارسىلاستارىن بىرىنەن سوڭ ءبىرىن ايقىن باسىمدىقپەن جەڭىپ، فينالعا جولداما الدى. قىزدار فينالدا تۇركيانىڭ «GAZI» كلۋبىمەن كەزدەسىپ، 2:0 ەسەبىمەن سەنىمدى جەڭىسكە جەتتى. ال ۇلدار قۇراماسى دا ءدال وسى قارسىلاستى 2:1 ەسەبىمەن ۇتىپ، چەمپيون اتاندى.
«بۇل – بۇكىل قازاقستاننىڭ جەڭىسى. اۋىلدان شىققان جاس سپورتشىلارىمىز حالىقارالىق ارەنادا ەل نامىسىن ابىرويمەن قورعاپ، كوك تۋىمىزدى بيىككە كوتەردى. بۇل جەتىستىك – ولاردىڭ تاباندىلىعى مەن ەڭبەگىنىڭ، سونداي-اق، اۋىل جاستارىنا مۇمكىندىك بەرۋدىڭ ناقتى ناتيجەسى. ءبىز الداعى ۋاقىتتا دا تالانتتاردى قولداپ، ولاردىڭ ۇلكەن سپورتتاعى جولىن جالعاستىرۋعا بار كۇشىمىزدى سالامىز»، – دەدى قوردىڭ اتقارۋشى ديرەكتورى عالىمبەك جاقسىلىقۇلى.
جەكە شەبەرلىگىمەن ەرەكشەلەنگەن ويىنشىلار دا نازاردان تىس قالمادى. قىزدار قۇراماسىنىڭ شابۋىلشىسى قۇرالاي باكەن ءتۋرنيردىڭ ۇزدىك ويىنشىسى اتانسا، ۇلدار كومانداسىنان ادمير ماحامەدجانوۆ ءدال وسىنداي مارتەبەگە يە بولدى. ولاردىڭ ونەرى – بۇكىل ەلدىڭ ماقتانىشى.
«جارىس وتە اسەرلى ءارى قىزىق ءوتتى. وندا ءار ەلدەن كەلگەن مىقتى سپورتشىلار بولدى. ولاردى جەڭۋ وڭاي بولعان جوق، حالىقارالىق دودا شەبەرلىكتى تالاپ ەتەدى. مۇندا ءبىز ءوزىمىزدى ەمەس، ەل نامىسىن قورعاۋدى ويلادىق. جارىس كۇنىن اسىعا كۇتتىك. دايىندىق بارىسى قىزۋ ءوتتى. «اۋىل سپورت» جوباسىنا دايىنداعان جاتىن ورنى، تاماق، شەتەلدەگى ەستەلىك ءۇشىن راقمەت. العىسىمىز شەكسىز. بۇل تەك ءبىزدىڭ ەمەس، اتا-انامىزدىڭ، باپكەرلەرىمىزدىڭ، بۇكىل اۋىلدىڭ ارمانى»، - دەدى جەڭىمپازداردىڭ ءبىرى ماعجان ءارىپجانوۆ.
بۇل جەڭىس «اۋىل سپورت» جوباسىنىڭ ماڭىزدىلىعىن تاعى ءبىر مارتە دالەلدەدى. اۋىلدان شىققان تالانتتارعا مۇمكىندىك بەرىلسە، ولار حالىقارالىق دەڭگەيدە دە توپ جارىپ، كوك تۋدى كوككە كوتەرە الاتىنىنا ايقىن دالەل. قازاقستاننىڭ كوك بايراعى انتاليا تورىندە ەكى رەت جەلبىرەدى. بۇل - ەل تاريحىنداعى جاس سپورتشىلاردىڭ جارقىن بەلەسى.
حالىقارالىق تۋرنير تۋرالى نە بەلگىلى؟
«Antalya Volleyball Friendship Cup U-16» – جىل سايىن تۇركيادا وتەتىن حالىقارالىق جاستار ءتۋرنيرى. تۋرنيرگە ادەتتە تۇركيانىڭ جەتەكشى كلۋبتارىمەن قاتار، ازيا مەن تاياۋ شىعىس ەلدەرىنىڭ كوماندالارى قاتىسادى. قازاقستان كوماندالارى بۇل تۋرنيردە ءساتتى دەبيۋت جاساپ، بىردەن چەمپيون اتانىپ، حالىقارالىق دەڭگەيدەگى الەۋەتىن ايقىن كورسەتتى.
