قىرعىزستان قورعانىس مينيسترلىگى رەسەيلىك اسكەري ۇشاقتاردىڭ وقۋ-جاتتىعۋ ۇشۋلارىن ۋاقىتشا توقتاتتى، دەپ حابارلايدى "ادىرنا" ۇلتتىق پورتالى.
31 ناۋرىز كۇنى قىرعىزستانداعى قانت اۋە بازاسىندا ورنالاسقان سۋ-25 شابۋىلداۋشى ۇشاعى وقۋ جاتتىعۋى كەزىندە ەكى وقۋ سناريادىن ابايسىزدا تاستاپ جىبەرگەن.
ۆەدومستۆونىڭ مالىمەتىنشە، «ەكى وقۋ سناريادىنىڭ رۇقساتسىز ءتۇسۋى» ۇشۋدىڭ ءۇشىنشى وقۋ بۇرىلىسى كەزىندە بولعان. سناريادتار ەلدى مەكەننەن تىس بوس جەرگە قۇلاعان.
وقيعا سالدارىنان زارداپ شەككەندەر مەن زاقىم كەلۋ فاكتىسى تىركەلمەگەن. الايدا جەر بەتىندە راديۋسى 2–3 مەتر بولاتىن ەكى شۇڭقىر پايدا بولعانى حابارلاندى. الدىن الا دەرەكتەر بويىنشا، جاعداي ىستىقكول وبلىسىنداعى سارى-قامىس اۋىلى ماڭىنداعى ەگىستىك القاپتار ۇستىندە بولعان.
قىرعىزستان قورعانىس مينيسترلىگى وقيعانىڭ سەبەپتەرى تولىق انىقتالعانعا دەيىن بارلىق وقۋ-جاتتىعۋ ۇشۋلارىن توقتاتقانىن مالىمدەدى. قازىر بۇل جاعداي بويىنشا اسكەري پروكۋراتۋرا تەكسەرىس جۇرگىزىپ جاتىر.
سونىمەن قاتار، رەسەيدىڭ اۋە-عارىش كۇشتەرى ارنايى كوميسسيا قۇرىپ، ونى جاقىن كۇندەرى قىرعىزستانعا جىبەرۋدى جوسپارلاپ وتىر.
