كيمەپ قۇپياسى. كىمگە تيەسىلى جانە تابىسى قايدا كەتەدى؟

ۇكىمەت وقۋ جىلىنىڭ باستالۋى قارساڭىندا مەملەكەتتىك ۋنيۆەرسيتەتتەردى جەكەشەلەندىرۋدىڭ زاڭدىلىعىن قاراستىرۋدا. جوعارى وقۋ ورىندارى جەكە قولعا ارزان باعامەن ساتىلدى دەۋگە نەگىز بار، سوندىقتان پرەمەر-مينيستر سمايىلوۆ جاعدايدى قاراپ، تەكسەرۋ ناتيجەسىن باس پروكۋراتۋراعا جىبەرۋدى تاپسىردى، دەپ جازادى "ادىرنا" پورتالى. بۇل تۋرالى تولىعىراق ulysmedia.kz ماتەريالىندا تارقاتىلدى.  2004 جىلى كيمەپ مەملەكەتتىك-جەكەمەنشىك ءبىلىم بەرۋ مەكەمەسى بولدى. اكتسيالاردىڭ ۇلەستەرى كەلەسىدەي ءبولىندى: 60% اكتسيا چان يان بەنگكە، ال قالعان 40% قازاقستان رەسپۋبليكاسى عىلىم مينيسترلىگىنە تيەسىلى. ترانزاكتسيانىڭ ناقتى قالاي جاسالعانى جانە بەنگ مىرزاعا ۋنيۆەرسيتەتتىڭ ۇلەسىن الۋ قانشاعا كەتكەنى بەلگىسىز، بۇل ساۋالعا كيمەپ: "پىكىرىڭىزگە راحمەت. ءوتىنىشىڭىزدى اعىلشىن تىلىندە جىبەرىڭىز. اعىلشىن تىلىندەگى سۇراۋدى العاننان كەيىن ءبىز جاۋاپ دايىندايمىز" دەپ جاۋاپ بەرگەن. سۇراتىلعان تىلدە قويىلعان ساۋالعا كيمەپ جەكە تۇلعا ۋنيۆەرسيتەتتەگى ۇلەستى قاشان جانە قانداي باعاعا ساتىپ الدى دەگەن ناقتى سۇراققا جاۋاپ بەرمەدى. ونىڭ ورنىنا ولار قارجىلىق ەسەپتىلىكتى ءوز بەتىنشە زەرتتەۋدى ۇسىندى. سونىمەن بىرگە جاۋاپ رەتىندە بەرىلگەن سىلتەمەدە 2005 جانە 2008 جىلدارعا ارنالعان ەسەپتەر ورنالاستىرىلعان جانە ۋنيۆەرسيتەت اكتسيالارىنىڭ 60% 2004 جىلى بەنگ مىرزاعا بەرىلگەن. ال بۇل اقپاراتتى ۋنيۆەرسيتەت راستادى. كيمەپ كوممەرتسيالىق ەمەس ۇيىم ەكەنىن اتاپ وتكەن ءجون. بۇل كومپانيانىڭ نەگىزگى ماقساتى رەتىندە كىرىس الۋدى كوزدەمەيتىنىن جانە الىنعان كىرىستى قاتىسۋشىلار اراسىندا بولمەيتىنىن بىلدىرەدى.