اتباسار تۇرمەسىندەگى ازاپتاۋ ۆيدەوسى تاراتىلعاننان كەيىن كولونيانىڭ سەگىز قىزمەتكەرى مەن باستىعى جۇمىستان بوساتىلىپ، قىلمىستىق ءىس قوزعالدى، دەپ حابارلايدى "ادىرنا" ۇلتتىق پورتالى. بۇل تۋرالى قۇقىق قورعاۋشى ەلەنا سەمەنوۆا مالىمدەدى.
«بۇگىن ءبىز باۋىرجان مۋسينمەن بىرگە كۇنى بويى قازىرگى بەلگىلى اتباسار كولونياسىندا بولدىق. سوتتالعاندارمەن، سونىڭ ىشىندە الەۋمەتتىك جەلىدە بەينەتاسپاعا تۇسىرىلگەندەرمەن سويلەستىك. (...) بۇگىن مەكەمە باسشىسىن قوسا العاندا، توعىز قىزمەتكەردى جۇمىستان بوساتۋ تۋرالى بۇيرىق شىعارىلدى، ەكى قىزمەتكەر ءالى دە ەڭبەك دەمالىسىندا، سونىمەن قاتار قىزمەتكەرلەرگە قاتىستى قىلمىستىق ىستەر قوزعالدى»، - دەدى سەمەنوۆا سارسەنبى كۇنى.
3 قىركۇيەكتە اقمولا وبلىسىنداعى اتباساردا كولونيا قىزمەتكەرلەرى اجەتحانا جۋدان باس تارتقان بەلسەندى تيمۋر دانەباەۆتى ۇرىپ-سوعىپ، قيناعان ۆيدەوسى تارادى. ۆيدەودا كولونيا قىزمەتكەرى كۇش قولدانۋعا ارنايى قۇرال قولدانۋعا بۇيرىق بەرەدى. وندا دانەباەۆتى جەرگە جاتقىزىپ، قول-اياعىن ۇستاپ، دۋبينكامەن ۇرعانى كورىنەدى.
بۇل ۆيدەونى "باسە" تەلەگرام-ارناسى جاريالادى. ۆيدەوداعى اقپاراتقا قاراعاندا، ۆيدەو 24 تامىزدا اقمولا وبلىسى اتباسار قالاسىنداعى كولونيادا تۇسىرىلگەن. ولاردى ارناعا مەكەمە اكىمشىلىگىنىڭ قىزمەتكەرى جىبەرگەن.
بيلىك "قىزمەت وكىلەتىن اسىرا پايدالانۋ" فاكتىسى بويىنشا تەكسەرۋ باستاعانىن مالىمدەدى. بىراق تۇتقىننىڭ حال-جاعدايى قالاي ەكەنىن ايتپادى.
38 جاستاعى تيمۋر دانەباەۆ 2022 جىلى قازاقستان پرەزيدەنتى قاسىم-جومارت توقاەۆتى قاڭتار وقيعاسى كەزىندە "ەلىمىزگە 20 مىڭ تەرروريست شابۋىل جاسادى" دەگەن ءسوزى ءۇشىن جاۋاپقا تارتۋعا تالپىنعان ازاماتتىق بەلسەندى رەتىندە تانىلعان.
بيىل 15 ماۋسىمدا استانا سوتى تيمۋر دانەباەۆتى "ۇلتارالىق ارازدىق قوزدىردى" (174-باپتىڭ 1-بولىگى) دەپ ايىپتاپ، ءۇش جىلعا بوستاندىعىنان ايىرعان. 1 تامىزدا اپەللياتسيا سوتى ۇكىمدى كۇشىندە قالدىردى. بەلسەندىنىڭ ادۆوكاتى ءلاززات تەمىرجانوۆا پروتسەستى جۇرگىزۋ ءتارتىبى بۇزىلعانى تۋرالى كەلتىرگەن ۋاجدەرىن سوت قابىلداماي تاستاعانىن ايتقان ەدى.
ۇقساس جاڭالىقتار
