قوس پورتتا ءىرى تەڭىز كولىكتىك-لوگيستيكالىق كلاستەرى قۇرىلادى

اقتاۋ جانە قۇرىق پورتىندا ءىرى تەڭىز كولىكتىك-لوگيستيكالىق كلاستەرى قۇرىلادى، دەپ حابارلايدى “ادىرنا” ۇلتتىق پورتالى 24KZ-كە سىلتەپ.

قۇرىق پاروم كەشەنى ارقىلى ازەربايجانعا مۇناي، مەتالل، ءداندى داقىلدار تاسىمالدانادى. وتكەن جىلى ءارتۇرلى جۇكتەردى اۋىستىرىپ تيەۋ كولەمى 2 ملن توننادان استى. بيىل جىل باسىنان بەرى 700 مىڭ تونناداي جۇك وتكەن. ترانسكاسپي حالىقارالىق كولىك باعىتىن دامىتۋ بويىنشا پورتتا اۋقىمدى جۇمىس ءجۇرىپ جاتىر. سونىڭ ءبىرى – تەڭىز ءتۇبىن تەرەڭدەتۋ. سونداي-اق قوسىمشا ايلاقتار سالۋ كۇن تارتىبىندە تۇر. «قازىرگى ۋاقىتتا ءتۇبىن تەرەڭدەتۋ جۇمىستارىن جۇرگىزەتىن كومپانيا انىقتالدى. بۇل – وسى سالاداعى كوشباسشى «يان دە نۋل» كومپانياسى. اتالعان جۇمىستار ماۋسىم ايىندا باستالىپ، جۇمىستار پورتتىڭ بارلىق اكۆاتورياسىندا جۇرگىزىلەتىن بولادى. بۇل پورت اكۆاتورياسىندا قوسىمشا 5 ايلاق قۇرۋعا مۇمكىندىك بەرەدى»، - «قۇرىق» تەڭىز پورتىنىڭ سەكتور باستىعى ايتقالي نۇرماعانبەتوۆ. بيىل قۇرىق پورتىندا جاڭا تەرمينالدى ىسكە قوسۋ جوسپارلانعان. نىسان جىلىنا 1 ملن توننا استىق ساقتاپ، جونەلتۋگە قاۋقارلى. بۇدان بولەك، 8 ايلاقتىڭ قۇرىلىسى باستالماق. بۇل سۋ ايلاعى اۋماعىندا جۇك تيەۋ الاڭىن 220 گەكتارعا دەيىن ۇلعايتۋعا مۇمكىندىك بەرەدى. ال اقتاۋ تەڭىز پورتىندا كونتەينەرلىك حاب قۇرىلىسىن 2025 جىلدىڭ سوڭىنا دەيىن اياقتاۋ كوزدەلىپ وتىر. بىرلەسكەن جوبا قۇنى – 43 ملرد 462 ملن تەڭگە. «قازىرگى ۋاقىتتا كورپوراتيۆتىك ءىس-شارالار جۇرگىزىلىپ جاتىر. كونتەينەرلىك حاب – بىرلەسكەن جوبا. ونى اقتاۋ تەڭىز ساۋدا پورتى، قازاقستاندىق مۋلتيمودالدىق لوگيستيكا كومپانياسى مەن قىتايلىق «ليانيۋنگان» پورتى جۇزەگە اسىرادى. حاب اقتاۋ سۋ ايلاعى ارقىلى 2025 جىلى 92 مىڭ، ال 2034 جىلى 200-300 كونتەينەر قابىلداپ، جونەلتۋگە مۇمكىندىك بەرەدى دەپ جوسپارلانعان»، – «اقتاۋ تەڭىز ساۋدا پورتى» ۇك» اق كولىك-لوگيستيكا ءبولىمىنىڭ جەتەكشى مامانى تالعات ناگۋمانوۆ. كاسپي دەڭگەيىنىڭ ءتۇسۋى قازاقستاندىق پورتتاردىڭ كەمە قابىلداۋىنا كەرى اسەر ەتتى. اقتاۋ پورتىندا دا تەڭىز ءتۇبىن تەرەڭدەتۋ قولعا الىندى. گەولوگيالىق بارلاۋ جاسالىپ، جوبالىق-سمەتالىق قۇجاتى ازىرلەنىپ جاتىر. ەڭ باستىسى، پورت جۇمىس قۋاتىن جوعالتقان جوق. بيىل قاڭتار-ءساۋىر ايلارى 1 ملن 541 توننادان استام ءارتۇرلى جۇك وتكىزدى. سونىڭ 1 ملن 248 مىڭ تونناسى – مۇناي ونىمدەرى. ال 2023 جىلى جالپى كولەمى 4 ملن 483 مىڭ توننا بولاتىن جۇكتەر اۋىستىرىپ تيەلگەن.