2025 جىلدىڭ كوكتەمىندە مۋزىكا الەمى كۇتپەگەن جاڭالىققا كۋا بولدى — باشقۇرتتىڭ Ay Yola توبى شىعارعان Homay ءانى الەمگە تانىلدى. بۇل وقيعا تەك مۋزىكالىق جەتىستىك قانا ەمەس، سونىمەن قاتار باشقۇرت مادەنيەتىنىڭ حالىقارالىق دەڭگەيدە مويىندالۋىنىڭ نىشانىنا اينالدى.
ساراپشىلار ءحيتتى "باشقۇرت مادەنيەتىنىڭ الەمگە ۇلكەن سەرپىلىسى" دەپ باعالاسا، سىنشىلار Ay Yola توبىنىڭ ءبىر مۇشەسى ۋكراينامەن سوعىستى قولدايتىنىن ەسكە سالىپ، باشقۇرتستان بيلىگى تاراپىنان قۇرمەتكە يە بولعان بۇل توپتىڭ بولاشاق شىعارماشىلىعىنا كۇمانمەن قارايتىندارىن جاسىرمادى.
باشقۇرت انىندە ۇماي ما، قۇماي ما؟
Homay ءانى— Ay Yola توبىنىڭ “ورال باتىر” ەپوسىنا نەگىزدەلگەن مۋزىكالىق تسيكلىندەگى ەكىنشى ءان. ءبىرىنشى شىعارىلىم — Batyr ءانى 2025 جىلدىڭ اقپانىندا شىققانىمەن، كەڭ تانىمالدىققا يە بولماعان ەدى. ال Homay بىردەن تىڭدارمانداردىڭ جۇرەگىن جاۋلاپ الدى. جۇرتشىلىق ەرەكشە ىقىلاس اۋدارىپ، قازاق، وزبەك، قىرعىز، تاتار سەكىلدى تۇركى حالىقتارى اراسىندا تەز تاراپ، تالقىلانىپ جاتتى.
الايدا، ءان ماتىنىندەگى «حوماي» ءسوزىن ءبىرى قازاق اڭىزىنداعى ۇماي-اناعا تەڭەسە، تاعى ءبىرى جىرتقىش قۇس "قۇماي" دەپ اۋداردى.
Ay Yola توبى ءوز بەينەبايانىندا ولەڭنىڭ قازاق تىلىندەگى نۇسقاسىن:
تامىرىم سۇرايدى
جانىم مەن قانىم سۇرايدى
ەجەلگى تاريحي جادىم سۇرايدى
قۇماي دەگەن كىم ءوزى؟
اناسى – كۇن نۇرى
تىرشىلىك سۋىنا شومىلدىرعان.
اكەسى ونىڭ – سامراۋ
مەيىرىمگە باۋلىعان، - دەپ كورسەتەدى.
سونىمەن، بۇل جەردە قۇماي — يران، اراب جانە ورتالىق ازيا حالىقتارىنىڭ ارابتانعان اڭىز-اڭگىمەلەرىندە سيقىرلى قۇس، ادەتتە باقىت قۇسى، جەرگە قونبايتىن جۇماق قۇسى دەپ دارىپتەلەدى. باشقۇرت ەپوستارىندا، اتاپ ايتقاندا، «ورال باتىر» مەن «اقبوزات” ەپوستارىندا قۇماي — اسپان سۇلۋى كۇن مەن قۇستار پاتشاسى سامرۇقتىڭ قىزى، اققۋ بەينەسىندەگى قىز رەتىندە سيپاتتالادى.
باشقۇرت زەرتتەۋشىسى شاۋرا شاكۋروۆانىڭ ايتۋىنشا، قۇماي — ءۇندى-يران، تۇركى-مونعول جانە فين-ۋگور حالىقتارىنىڭ ميفولوگياسىندا وتباسىلىق وشاقتىڭ، مالدىڭ، بالالاردىڭ قامقورشىسى، ايەل باستاماسىنىڭ، جەر مەن قۇنارلىلىقتىڭ بەينەسى. ورال باتىر مەن قۇمايدان تۋعان ەدىل باتىر — اكەسىنىڭ ءىسىن جالعاستىرۋشى، باشقۇرت رۋلارىنىڭ ءبىرىنىڭ ارعى تەگى.
«ورال باتىر» — باشقۇرت حالىق اۋىز ادەبيەتىنىڭ كونە ەسكەرتكىشى، جىراۋلاردان ۇرپاقتان ۇرپاققا اۋىزشا تاراعان. العاش رەت 1910 جىلى حاتقا تۇسكەن.
ەپوستىڭ جەلىسى — ادامدار باقىتى ءۇشىن ورال باتىردىڭ تابيعاتتىڭ زۇلىم كۇشتەرىمەن (داۋلەر مەن ايداھارلار), سونداي-اق جاۋ جاعىنا وتكەن باۋىرى شۇلگەنمەن كۇرەسى تۋرالى. بۇل كۇرەس داۋلەر مەن ايداھارلاردىڭ جەڭىلىپ، ولاردىڭ دەنەلەرىنەن ورال تاۋلارىنىڭ پايدا بولۋىمەن جانە ورال باتىردىڭ ولىمىمەن اياقتالادى.
توپ تۋرالى نە بىلەمىز؟
Ay Yola توبى 2024 جىلى ۋفا قالاسىندا قۇرىلعان. توپ قۇرامىندا — مۋزىكانت، دىبىس رەجيسسەرى جانە پروديۋسەر رۋسلان شايحيتدينوۆ (DJ Ruslan Sever), ونىڭ قىزى، ءانشى ءارى مۋزىكانت ادەل شايحيتدينوۆا، جانە «ارعىماق» ەتنو-توبىنىڭ جەتەكشىسى ءارى ءانشى رينات رامازانوۆ بار.
"Ay Yola" باشقۇرت تىلىندە "عالام زاڭدارى", "جاراتىلىس ەرەجەلەرى", ياعني ولتىرمە، ۇرلاما، ۇلكەندى سىيلا، كىشىنى قورعا دەگەن ماڭگىلىك قۇندىلىقتاردى بىلدىرەدى. ءبىزدىڭ جوبامىز وسى قاعيدالارعا سۇيەنەدى. ءبىز مۋزىكالىق البوم عانا ەمەس، تولىمدى شوۋ-ميۋزيكل، الەمنىڭ ەڭ جۇمباق ءارى ەجەلگى ەپوستارىنىڭ ءبىرى – "ورال باتىردان" شابىت العان ينتەرنەت-جوباسىن ۇسىنامىز. ءبىز ەپوستىڭ قازىرگى زامانعى ينتەرپرەتاتسياسى وسى بىرەگەي تۋىندىنى كەڭىنەن تانىتۋعا، ەجەلگى تاريحپەن جاقىن تانىسۋعا جانە «Ay Yola» ۇعىمىنىڭ تەرەڭ ماعىناسىن – بۇكىل ادامزاتقا ورتاق ماڭگىلىك قۇندىلىقتاردى تۇسىنۋگە كومەكتەسەدى دەپ سەنەمىز”، - دەگەن ەدى رامازانوۆ ءباسپاسوز قۇرالىنا.
«باشقۇرت مادەنيەتىنىڭ الەمگە سەرپىلىسى»
ءان شىققاننان كەيىن قىسقا ۋاقىت ىشىندە مۋزىكالىق Shazam قوسىمشاسىنىڭ جاھاندىق چاتىندا ۇزدىك بەستىككە كىرىپ، ءتىپتى لەدي گاگانىڭ Abracadabra انىنەن دە وزىپ كەتتى. Homay قازاقستان، وزبەكستان جانە ۋكراينا چارتتارىندا دا ءبىرىنشى ورىنعا شىقتى.
باق-تاردىڭ جازۋىنشا، بۇل جەتىستىككە جەتۋدە الەۋمەتتىك جەلىلەر ۇلكەن ءرول اتقاردى. TikTok پەن Instagram-دا بۇل انگە بي بيلەگەننەن باستاپ ءتۇرلى ۆيزۋالدى وقيعالار جاساعان ۆيدەولار پايدا بولدى. وسىلايشا، ءان ۆيرۋس سەكىلدى تارالىپ، تانىمالدىققا يە بولدى.
«بۇل — باشقۇرت مادەنيەتىنىڭ الەمگە ۇلكەن سەرپىلىسى. بۇرىن-سوڭدى باشقۇرت ءانى بىرنەشە ەلدە بىردەن حيت بولىپ كەتكەنى ەسىمدە جوق»، - دەيدى باشقۇرت ساياسي ەميگرانتى رۋسلان گابباسوۆ.
ال باشقۇرت رەپەرى، بايماقتاعى نارازىلىقتاردان كەيىن رەسەيدەن كەتكەن ونەرپاز التىناي ۆاليتوۆ توپ «ورال باتىر» ەپوسىن ناسيحاتتاپ، باشقۇرت مادەنيەتى مەن باشقۇرتستاندى الەمگە تانىتاتىنىن ايتتى.
"Instagram مەن TikTok-تاعى قولدانۋشىلار بۇل انمەن تەك كوڭىل كوتەرەتىن ريلس ءتۇسىرىپ قانا قويماي، ۇلتتىق كيىمدەرىن كيىپ، ءاننىڭ ولاردى تەرەڭ تەبىرەنتكەنىن ايتىپ، ءوز حالقىنىڭ تاريحىن زەرتتەۋگە يتەرمەلەگەنىن جەتكىزۋدە", - دەپ جازدى تاتارستانداعى "بيزنەس Online" باسىلىمى.
باسىلىمنىڭ جازۋىنشا، اننەن تۇركى حالىقتارى ءوز ماعىنالارىن تاپقان.
مۋزىكالىق سىنشى، Telegram-داعى "رۋسسكي شاففل" ارناسىنىڭ اۆتورى ولەگ كارمۋنين بىلاي دەپ جازدى:
ء“ان الدىمەن تۇركى حالىقتارىنىڭ اراسىندا ۆيرۋس سەكىلدى تارالدى. مىسالى، قازاقتار بۇل اننەن وزدەرىنە تانىس ءۇن ەستىگەندەرىن ايتۋدا. ال YouTube-تاعى ەڭ كوپ لايك جيناعان پىكىرلەردىڭ ءبىرى تۇرىك تىلىندە جازىلعان”.
HOMAY ءانى نە ءۇشىن سىنعا ۇشىرادى؟
Ay Yola توبىنىڭ Homay ءانى ءبىر جاعىنان حالىقتىڭ ىستىق ىقىلاسىنا بولەنسە، ەكىنشى جاعىنان ءارتۇرلى سىن مەن پىكىرتالاسقا سەبەپ بولدى. ءاننىڭ تابىسى ونىڭ كوركەمدىك تۇتاستىعى مەن تەرەڭ تاريحي-مادەني ماعىناسىنا بايلانىستى بولسا دا، وعان قاتىستى داۋ-داماي دا از ەمەس.
"بيزنەس Online" باسىلىمى Homay ءانىنىڭ جاڭاشىلدىعى كۇمان تۋدىراتىنىن جازدى.
"ورىس ءتىلدى ينتەرنەت كەڭىستىگىندەگى مۋزىكا تىڭدارماندارى Ay Yola توبىن تۇپنۇسقا ەمەس دەپ ايىپتاۋدا. ولاردىڭ ايتۋىنشا، بۇل تەك «ۇلتتىق ناقىشتى پايدالانۋ» عانا. راسىندا، رەسەيدە ەلەكتروندى مۋزىكانى فولكپەن ۇيلەستىرەتىن ۇجىمدار از ەمەس. مىسالى، ياكۋت تىلىندە ونەر كورسەتەتىن كراسنويارداعى Otyken توبى نەمەسە تينا كۋزنەتسوۆا مەن ونىڭ جۇبايى يۋري ۋساچەۆتىڭ Zventa Sventana جوباسى بار”، - دەلىنگەن باسىلىمدا.
"ءان ءماتىنى يسلامعا قايشى"
تاعى ءبىر سىن – ءدىني سيپاتتا. InKazan باسىلىمى بلوگەر گۇزەل حۋسنۋتدينوۆانىڭ پىكىرىن كەلتىرىپ:
ء"اننىڭ اۋدارماسى يسلام دىنىنە قاتتى قايشى كەلەدى",- دەپ جازدى. Telegram-چاتتاردا دا كەيبىر باشقۇرت قولدانۋشىلارى بۇل پىكىردى قولدادى.
الايدا باشقۇرت ساياسي ەميگرانتى رۋسلان گابباسوۆ بۇل پىكىرلەرگە مىسقىلمەن جاۋاپ بەردى:
"باشقۇرتتاردا يسلام – وتە جۇمساق، زايىرلى سيپاتتا. كوپشىلىگى ءدىندى قاتاڭ ۇستانبايدى. ءتىپتى ەڭ ءدىنشىل باشقۇرتتىڭ ءوزى قۋراي (سىبىزعى) تىڭدايدى، ءان تىڭدايدى، سەبەبى ءبىز – مۋزىكانى سۇيەتىن حالىقپىز»، - دەيدى ول.
ءتىل جانە اكتسەنت ماسەلەسى
باشقۇرت ءتىلىنىڭ كوپتەگەن بىلگىرلەرى ءانشى ادەل شايحيتدينوۆانىڭ ورىنداۋىنداعى ءتىل تازالىعىن سىنعا الدى. رەجيسسيور ءارى قوعام قايراتكەرى تانسۋلپان بۋراكاەۆا بۇل تۋرالى بىلاي دەدى:
”Homay-دان ءبىز ءوزىمىزدى تاني المادىق. سەبەبى ماتىندەردە سايكەسسىزدىك كوپ، دىبىستار دۇرىس ايتىلماعان. مۋزىكا ماڭىزدى، بىراق ءبىز ءۇشىن ساپالى ءماتىن مەن دۇرىس باشقۇرت ءتىلى ودان دا ماڭىزدى. ايتقىم كەلەتىنى – ءماتىندى جازۋعا كاسىبي اقىنداردى نەمەسە ءتىلدى جاقسى بىلەتىن ادامداردى تارتۋ كەرەك. سوندا عانا حالىقتىڭ العىسىنا يە بولادى", - دەيدى ول.
باشقۇرت رەپەرى التىناي ۆاليتوۆ تا ءاندى العاشىندا جاقتىرماعانىن مويىندادى.
"مەن ءبىرىنشى رەت تىڭداعاندا، سوزدەردىڭ دۇرىس ايتىلماعانىنا رەنجىدىم. ريفما وتە قاراپايىم، مەكتەپ وقۋشىلارىنىڭ دەڭگەيىندەي كورىندى. بىراق كەيىننەن، قاراپايىم ءتىل، جارقىن مۋزىكا، ورىنداۋشىلاردىڭ وبرازى، اسىرەسە ادەلدىڭ كەلبەتى مەن كونە "ورال باتىر" ەپوسى – ءبارى ۇيلەسىپ، بۇل ءاندى بيىككە كوتەردى. بۇرىن-سوڭدى بىردە-ءبىر باشقۇرت ورىنداۋشىسى مۇنداي جەتىستىككە جەتكەن ەمەس", - دەدى ول.
ادەل شايحيتدينوۆا بولسا، ءوز اكتسەنتىنە قاتىستى پىكىرلەردى قالىپتى قابىلدايتىنىن ايتتى.
"مەن – جارتىلاي باشقۇرتپىن، جارتىلاي ورىسپىن. وتباسىمىزدا ءتىل بىلەتىندەر جوق. بىراق بۇل ماعان باشقۇرت مادەنيەتىنە قىزىعۋعا جانە ءوز تىلىمدە ءان ايتۋعا كەدەرگى ەمەس", - دەدى ول.
ساياسي ۇستانىم
كوپتەگەن پىكىرتالاستىڭ وزەگى – توپ مۇشەلەرىنىڭ رەسەي مەن ۋكراينا اراسىنداعى سوعىسقا قاتىستى ۇستانىمى. 2023 جىلى رينات رامازانوۆ الەۋمەتتىك جەلىدە باۋىرىن "ارنايى اسكەري وپەراتسيا ايماعىنا" شىعارىپ سالعانى تۋرالى جازبا جاريالاعان. بۇعان قوسا، رەسەي اسكەرىنە ارنالعان كومەكتەر تۋرالى جازبالاردى بولىسكەنى دە ايتىلدى.
2022 جىلى قازاندا وتكەن قايىرىمدىلىق كونتسەرتىندە رامازانوۆ "دحر مەن لحر-گە اقشا جىبەرۋگە" شاقىرعان.
ايتا كەتەرلىگى، كەيبىر سوعىس جاقتاستارىنىڭ ءوزى Homay انىنە تەرىس كوزقاراس تانىتقان.
"Z-بلوگەرلەر Homay ءانىنىڭ اسا تانىمال بولۋىنان شوشىنىپ، توپتان سوعىستى قولدايتىن مالىمدەمە جاساپ، ءتىپتى رەسەي تۋىمەن كليپ ءتۇسىرۋدى تالاپ ەتۋدە. ولار بۇل ءاندى ۇناتاتىنداردىڭ ءبارىن رەسەيدىڭ ىدىراعانىن قالايتىن پانتيۋركيزم جاقتاستارىنا جاتقىزىپ، پانتيۋركيزمدى ەكسترەميزممەن تەڭەستىرىپ، قىلمىستىق قۋدالاۋعا الۋدى ۇسىندى", - دەپ جازدى باشقۇرتستاندىق Telegram-ارنالارى.
قازاقستاندىڭ AIRAN YouTube-ارناسى دا انگە قاتىستى سۇراعى بارىن جاسىرمادى.
"سۇراق تۋدى: ونەرپازدىڭ ساياسي كوزقاراسى ماڭىزدى ما؟ ەگەر ول اگرەسسيا مەن زورلىقتى ناسيحاتتاسا، ونىڭ شىعارماشىلىعىن قالاي قابىلداۋعا بولادى؟ رەسەيدىڭ ۋكرايناعا باسىپ كىرۋىنەن كەيىن بۇل ماسەلە وتە وزەكتى بولا ءتۇستى", - دەگەن پىكىر ايتىلدى.
رۋسلان گابباسوۆ بولسا، توپ مۇشەلەرىنىڭ ىشىندە تەك رينات رامازانوۆتىڭ عانا سوعىستى اشىق قولدايتىنىن اتاپ ءوتتى.
"ەگەر ولار سوعىسقا قارسى شىقسا، ولاردى نە ءۇنسىز قالۋعا، نە ەميگراتسياعا ءماجبۇر ەتەر ەدى. ازىرگە ءۇنسىز جۇرگەنى – ءوز الدىنا باتىلدىق", — دەدى ول.
گابباسوۆتىڭ ايتۋىنشا، توپ شەتەلدە ونەر كورسەتكەندە، بۇل تاقىرىپ قايتا كوتەرىلۋى مۇمكىن.
"ەگەر سەن تۇركى الەمىنە شىققىڭ كەلسە، بىراق رەسەي يدەولوگياسىمەن بايلانىسىڭ بولسا، وندا سىنعا ۇشىرايسىڭ، ءتىپتى كونتسەرتتەرىڭدى توقتاتۋى دا مۇمكىن", - دەيدى ول.
مەملەكەتتىك ماراپات پەن ساياسي نازار
2025 جىلدىڭ ءساۋىر ايىندا باشقۇرتستان باسشىسى رادي حابيروۆ Ay Yola مۇشەلەرىن مەملەكەتتىك ماراپاتتارمەن قۇتتىقتادى. رينات رامازانوۆ "باشقۇرتستاننىڭ حالىق ءارتىسى" اتاعىن السا، رۋسلان مەن ادەل شايحيتدينوۆتار "باشقۇرستان رەسپۋبليكاسىنىڭ ەڭبەك سىڭىرگەن ءارتىسى" اتاندى.
بۇدان سوڭ، "باشقۇرتتاردىڭ دۇنيەجۇزىلىك قۇرىلتايى" Ay Yola توبىنا ءوزىنىڭ ەڭ مارتەبەلى ماراپاتى – "ال دا نۋر ءساس حالҡىڭا!" مەدالىن تابىستادى. بۇل – ۇلتتىق مادەنيەت پەن ءتىلدى دامىتۋعا قوسقان ۇلەس ءۇشىن بەرىلەتىن ەڭ جوعارى ماراپاتتاردىڭ ءبىرى.
بىراق سىنشىلاردىڭ ايتۋىنشا، بۇل — بيلىكتىڭ ءوز يدەولوگياسىنا جاقىن ونەرپازداردى باقىلاۋعا الۋ ءتاسىلى.
"قازىر بۇل توپتى بيلىك جاعىنا تارتۋ ءۇشىن كۇرەس ءجۇرىپ جاتىر", - دەيدى گابباسوۆ.
جاڭا اندەر، كونتسەرتتەر جانە قىمبات كورپوراتيۆتەر
قازىر Ay Yola توبىنىڭ مۋزىكانتتارى الەۋمەتتىك جەلىلەرىندەگى پاراقشالارىنا قاراعاندا، فەدەرالدىق باق-قا ءجيى سۇحبات بەرىپ، جاڭا كومپوزيتسيالارمەن جۇمىس ىستەپ جاتقانىن ايتىپ ءجۇر.
ء“ۇش اپتا سايىن ءبىز جاڭا ءان شىعارامىز. كەلەسى ءانىمىز — “ۋگەز", ورال باتىردىڭ شايقاسىنا ارنالعان، ساۋىردە شىعادى. 2025 جىلدىڭ كۇزىنىڭ سوڭىنا دەيىن ەپوستىڭ ءاربىر تاراۋىنا ارنالعان اندەرمەن تانىستىرامىز. بۇل اندەر تەك مۋزىكالىق تۋىندىلار ەمەس، ولاردىڭ ارقايسىسىندا تەرەڭ ماعىنا بار، ەپوستان الىنعان تۇپنۇسقا ماتىندەر كوپ”، - دەدى ناۋرىز ايىنىڭ سوڭىندا توپتىڭ مۇشەسى جانە پروديۋسەرى رۋسلان شايحيتدينوۆ.
وتكەن اپتادا توپ "تۋعان تەل"(تۋعان ءتىل) دەپ اتالاتىن جاڭا ءانىن شىعاردى. الايدا كەيبىر تىڭدارمان تىلدىك جاعىنان ءانشىنى تاعى دا سىنادى.
سوڭعى سۇحباتتارىنىڭ بىرىندە توپ مامىر ايىندا قازاقستان، وزبەكستان جانە قىرعىزستانعا گاسترولدىك تۋر، ماۋسىمدا 12 اننەن تۇراتىن البومنىڭ جارىق كورۋى، سونداي-اق جازدىڭ سوڭىندا نەمەسە كۇزدىڭ باسىندا ۋفادا ۇلكەن كونتسەرت وتەتىنىن جاريا ەتتى.
باشقۇرت مادەنيەتىن ناسيحاتتاۋ نەمەسە كۇنكورىس
ساۋىردەن باستاپ Ay Yola كورپوراتيۆتىك كەشتەردە دە ونەر كورسەتە باستادى – ءبىر رەتتىك ونەر كورسەتۋ قۇنى 700 000 رۋبل (4.3 ملن. تەڭگە) دەپ جازادى باق.
“وكىنىشكە قاراي، ولار قازىرگى تابىسىن كونتسەرتتەردەن دە، كليپتەردەن دە تاپپاي وتىر. مۇمكىن، ولار كليپ تۇسىرۋگە قاراجات جيناپ جاتقان بولار، بىراق مەنىڭ قورقىنىشىم — ولار بەلگىلى ءبىر قالىپقا ءتۇسىپ قالادى، كورپوراتيۆتەردەگى تاپسىرىس بەرۋشى مەن كورەرمەننىڭ كۇتكەنىنە بەيىمدەلە باستايدى. ەگەر تەرەڭىرەك ايتساق، بۇل تابىس تابۋ فورماسى ولاردىڭ ءان تسيكلىنىڭ باستى يدەياسىمەن – ورال باتىردىڭ حالىق باقىتى ءۇشىن ءوزىن قۇربان ەتۋىمەن – ۇيلەسپەيتىن سياقتى. ادامدار تاماق ءىشىپ وتىرعان داستارقان باسىندا ورال باتىر، قۇماي، سامۇرىق جانە باسقا دا بايىرعى باشقۇرت ميفولوگياسىنىڭ جانپيدا كەيىپكەرلەرى جايلى ءان ايتۋ ءبىر ءتۇرلى... شىنىمدى ايتسام، ءارى كۇلكىلى، ءارى قىزىق – بۇل جاعداي نەمەن اياقتالادى ەكەن دەپ ويلاناسىڭ“، - دەيدى باشقۇرت مادەنيەت قايراتكەرلەرىنىڭ ءبىرى.
AY YOLA توبىنىڭ الدىنداعى تاڭداۋ
سۇحبات سوڭىندا مادەنيەت قايراتكەرى Ay Yola توبىنىڭ الدىندا ەكى تاڭداۋ بارىن ايتتى.
ء“بىر جاعىنان، ارينە، قۋانتادى – بۇل توپتىڭ ارقاسىندا ادامدار باشقۇرت مادەنيەتىمەن، ورال باتىرمەن تانىسىپ جاتىر. بىراق ەكىنشى جاعىنان، كوڭىل تۇسەدى — ولاردى بىردەن وزىنە باعىندىرىپ، ورال باتىردىڭ ساتقىن ءىنىسى شۇلگەنگە اينالدىرۋعا تىرىسىپ جاتىر. مەنىڭشە، ولاردىڭ الدىندا ەكى-اق جول تۇر: نە بيلىكتىڭ ميكروفونىنا اينالىپ، ونى اشىق قولداۋ، نە قارسى شىعىپ، بىردەن قىسىم كورۋ. بۇل – “ورال باتىر" ەپوسىنداعى كەيىپكەرلەر دە تاڭداعان جول، ەندى بۇل تاڭداۋ Ay Yola توبىنىڭ الدىندا تۇر”، - دەپ قورىتىندىلادى ول.
