تالدىقورعاندا شەرزات پولاتتىڭ ولىمىنە قاتىستى سوت پروتسەسى جالعاسۋدا

1763
Adyrna.kz Telegram
https://adyrna.kz/content/uploads/2024/05/0e06be68-eb33-483b-8649-0e401187e053-960x500.jpeg?token=5f4432a22ab0bc8df320beb7297155b3

جەتىسۋ وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا شەرزات پولاتتىڭ ولىمىنە بايلانىستى كەزەكتى سوت وتىرىسى باستالدى. وتىرىستى جوعارعى سوتتىڭ رەسمي YouTube ارناسىنان تىكەلەي ەفيردە كورۋگە بولادى، دەپ حابارلايدى "ادىرنا" ۇلتتىق پورتالى.

الدىڭعى سوت وتىرىسىندا كۋاگەرلەردەن جاۋاپ الۋ ءراسىمى اياقتالىپ، سوت توراعاسى ەرجان جانۇزاقوۆ باستى ايىپتالۋشى دارحان اسكەنتايدان جاۋاپ الدى. ايىپتالۋشى وزىنە تاعىلعان ايىپپەن تاعى دا كەلىسپەيتىنىن مالىمدەدى.

سوت پروتسەسى بارىسىندا ايىپتالۋشىلاردىڭ ادۆوكاتتارى پروكۋروردى اۋىستىرۋ تۋرالى ءوتىنىش ءبىلدىردى، سۋديا بۇل تالاپتى قاناعاتتاندىرمادى.

وتىرىستا دۇكەن كامەرالارىنا جازىلعان وقيعانىڭ تولىق ۆيدەوبەينەسى كورسەتىلدى. بۇعان دەيىنگى العاشقى وتىرىستاردا پروكۋرور ءىستىڭ تولىق حرونولوگياسىن بايانداپ بەرگەن ەدى.

ەسكە سالايىق، قايعىلى وقيعا 2023 جىلدىڭ 4 قازانىندا ورىن العان. سالدارىنان 16 جاستاعى شەرزات پولات قازا تاپقان.

وسى وقيعادان كەيىن شەرزاتتىڭ وتباسىنا قاتىستى بىرنەشە كۇماندى جاعدايلار تىركەلدى. 2024 جىلدىڭ 12 قازانىندا ولاردىڭ ءۇيى ورتەنىپ، "بوتەننىڭ مۇلكىن قاساقانا جويۋ" بابى بويىنشا ءىس قوزعالدى. ال جەلتوقسان ايىندا تالعار ماڭىنان شەرزاتتىڭ اعاسى نۇرعاناتتىڭ ءمايىتى تابىلعان ەدى.

سوت پروتسەسى ءالى دە جالعاسۋدا.

پىكىرلەر