الماتى قالاسى باسشىسى قىزمەتىنە ەكى ۇمىتكەر ۇسىنىلعان. سونىڭ ءبىرى دارحان ساتىبالدى قالالىق ءماسليحاتتا باسىم داۋىس جيناپ، الماتى اكىمى اتاندى، دەپ حابارلايدى “ادىرنا” ۇلتتىق پورتالى.
الماتى اكىمى قىزمەتككەرىنەن ۇمىتكەر بولعان ەكىنشى شەنەۋنىك — بەيبىت شاحانوۆ.
اشىق داۋىس بەرۋ ناتيجەسىندە دارحان ساتىبالدىنى 23 دەپۋتات قولداسا، ەكىنشى ۇمىتكەر — الماتى اكىمىنىڭ ورىنباسارى بەيبىت شاحانوۆ 9 داۋىسقا يە بولدى.
ءماسليحات وتىرىسىنا قاتىسقان قر پرەمەر-ءمينيسترى ولجاس بەكتەنوۆ مەملەكەت باسشىسىنىڭ جاڭا اكىمگە جۇكتەگەن بىرقاتار ماڭىزدى مىندەتتەرىن جاريالادى. اتاپ ايتقاندا، الماتىنىڭ ينجەنەرلىك ينفراقۇرىلىمىن جاڭعىرتۋ، قوعامدىق كەڭىستىكتەردى كەڭەيتۋ جانە قالانىڭ ەكونوميكالىق قۇرىلىمىن ءارتاراپتاندىرۋ نەگىزگى باسىمدىقتار رەتىندە اتالدى.
الماتى اكىمىنىڭ ورىنباسارى بەيبىت شاحانوۆ 1979 جىلى تۋعان. ابىلاي حان اتىنداعى قازاق مەملەكەتتىك حالىقارالىق قاتىناستار جانە الەم تىلدەرى ۋنيۆەرسيتەتىن; قازاق مەملەكەتتىك زاڭ ۋنيۆەرسيتەتىن; قازاق كوممەرتسيالىق-قارجى اكادەمياسىن; لانكاستەر ۋنيۆەرسيتەتىن (ۇلىبريتانيا) بىتىرگەن. ەڭبەك جولىن تابيعي مونوپوليالاردى رەتتەۋ اگەنتتىگىندە جەتەكشى مامان رەتىندە باستادى.
ءار جىلدارى قارجى مينيسترلىگىنىڭ، ءبىلىم جانە عىلىم مينيسترلىگىنىڭ، قورشاعان ورتانى قورعاۋ مينيسترلىگىنىڭ قۇرىلىمدىق بولىمشەلەرىندە باسشىلىق قىزمەت اتقاردى.
2015-2022 جىلدارى قر ۇلتتىق ەكونوميكا مينيسترلىگىنىڭ، ينۆەستيتسيالار جانە دامۋ مينيسترلىگىنىڭ، يندۋستريا جانە ينفراقۇرىلىمدىق دامۋ مينيسترلىگىنىڭ قۇرىلىس، تۇرعىن ءۇي-كوممۋنالدىق شارۋاشىلىق جانە جەر رەسۋرستارىن باسقارۋ ىستەرى كوميتەتىندە جۇمىس ىستەدى. الماتى قالاسى قۇرىلىس باسقارماسىنىڭ باسشىسى بولىپ جۇمىس ىستەدى.
2023 جىلعى مامىردان باستاپ الماتى قالاسى اكىمى اپپاراتىنىڭ باسشىسى، كەيىن اكىم ورىنباسارى بولىپ جۇمىس ىستەدى.
ۇقساس جاڭالىقتار
