استانادا كەنەسارى حاننىڭ ەسكەرتكىشى جوندەۋ جۇمىستارىنان ءوتىپ، قايتا ءوز ورنىنا قويىلدى، دەپ حابارلايدى "ادىرنا" ۇلتتىق پورتالى.
بۇل تۋرالى قازاقستان رەسپۋبليكاسىنىڭ مەملەكەتتىك كەڭەسشىسى ەرلان قارين ءوزىنىڭ الەۋمەتتىك جەلىدەگى پاراقشاسىندا ءبولىستى.
"وتكەن جىلى جوندەۋ جۇمىستارىنا بايلانىستى كەنەسارى حاننىڭ ەسكەرتكىشى الىنىپ تاستالعان كەزدە، الەۋمەتتىك جەلىدە ءبىراز اڭگىمە بولدى. قايتا-قايتا تۇسىنىكتەمە بەرگەنىمە قاراماستان، راستالماعان اقپارات تاراعان بولاتىن. شىن مانىندە ەسكەرتكىشكە جوندەۋ جۇمىستارى قاجەت بولدى. ەندى قازىر بۇرىنعىمەن سالىستىرعاندا بيىكتىگى دە ۇزارتىلدى. بۇگىن، مىنە، جوندەۋ جۇمىستارى اياقتالىپ، ەسكەرتكىش ورنىنا قويىلدى" - دەدى ەرلان قارين.
وتكەن جىلى قاراشا ايىندا رەسەي پرەزيدەنتى ۆلاديمير پۋتين كەلەر الدىندا ەسىل وزەنىنىڭ وڭ جاعالاۋىندا ورنالاسقان ەسكەرتكىشتى ۋاقىتشا الىپ تاستاعان بولاتىن. استانانىڭ مادەنيەت باسقارماسى ونىڭ سەبەبىن ەسكەرتكىشتىڭ قاۋىپتى دەپ تانىلعانىمەن جانە ىرگەتاسى قيسايىپ، قۇلاۋ قاۋپىندە تۇرعانىمەن تۇسىندىرگەن ەدى.
