31 مامىر – قازاقستان تاريحىنداعى ەڭ قايعىلى كۇندەردىڭ ءبىرى. بۇل – حح عاسىردىڭ باسىندا ەلىمىزدە ورىن العان جاپپاي ساياسي قۋعىن-سۇرگىن مەن ميلليونداعان ادامنىڭ ءومىرىن جالماعان اشارشىلىق قۇرباندارىن ەسكە الۋ كۇنى.
1930-1950 جىلدار ارالىعىندا كەڭەستىك بيلىك تاراپىنان جۇرگىزىلگەن ساياسي قۋعىن-سۇرگىن قازاقستاندى ءبىر ۇلكەن تۇرمەگە اينالدىردى. الجير، كارلاگ، ستەپلاگ سىندى گۋلاگ جۇيەسىنىڭ ءىرى لاگەرلەرى ءدال وسى قازاق دالاسىندا ورنالاسىپ، وعان 5 ميلليوننان استام ادام جەر اۋدارىلدى. ونىڭ ىشىندە 100 مىڭعا جۋىق قازاقستاندىق قۋعىن-سۇرگىنگە ۇشىراپ، 20 مىڭنان استامى اتۋ جازاسىنا كەسىلدى.
قازاق ۇلتىنىڭ ۇلى تۇلعالارى – ءاليحان بوكەيحان، احمەت بايتۇرسىنۇلى، مىرجاقىپ دۋلاتوۆ، ماعجان جۇماباەۆ، ساكەن سەيفۋللين، ءىلياس جانسۇگىروۆ، بەيىمبەت مايلين جانە باسقا دا زيالىلار وسى زۇلمات جىلداردىڭ جازىقسىز قۇربانى بولدى.
سونىمەن قاتار بۇل كەزەڭدە اشارشىلىق ناۋبەتى دە تالاي وتباسىنىڭ ءتۇتىنىن ءوشىرىپ، حالىق سانىن كۇرت كەمىتتى. 1930-جىلدارداعى ۇجىمداستىرۋ مەن كۇشتەپ وتىرىقشىلاندىرۋ ساياساتى قازاق حالقى ءۇشىن ورنى تولماس تراگەدياعا اينالدى.
1997 جىلى 31 مامىر — ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى بولىپ رەسمي
تۇردە بەكىتىلدى. بۇعان دەيىن، 1993 جىلى «جاپپاي ساياسي قۋعىن-سۇرگىن قۇرباندارىن اقتاۋ» تۋرالى زاڭ قابىلدانىپ، ادىلەتسىز جازالانعان ازاماتتاردىڭ ەسىمى اقتالا باستادى.
الايدا الماتى، قاراعاندى، اقتوبە جانە اقساي قالالارىنىڭ اكىمدىكتەرى 31 مامىردا جوسپارلانعان ساياسي قۋعىن-سۇرگىن جانە اشارشىلىق قۇرباندارىن ەسكە الۋ شارالارى اياسىنداعى بەيبىت شەرۋلەرگە رۇقسات بەرمەگەن. قاراعاندىدا شەرۋ وتكىزۋگە تىيىم سالۋدىڭ رەسمي سەبەبى رەتىندە باسقا دا مادەني، سپورتتىق جانە قۇرىلىس-مونتاج جۇمىستارى كورسەتىلدى.
ال الماتى مەن اقسايدا اكىمدىك وتىنىشتەردى سەبەپسىز كەرى قايتاردى، اقتوبەدە اباتتاندىرۋ جۇمىستارى نەگىزگە الىنعانى ايتىلعان.
بۇل جاعدايعا ۇقساس شەكتەۋلەر استانا، وسكەمەن، شىمكەنت، پاۆلودار، پەتروپاۆل، ورال جانە سەمەي قالالارىندا دا ورىن العان. كەيبىر اكىمدىكتەر ەشقانداي تۇسىنىكتەمە بەرمەي، وتىنىشتەردى كەرى قايتارعان. قاۋپى بار ازاماتتارعا اكىمشىلىك جاۋاپكەرشىلىك پەن 15 تاۋلىككە دەيىن قاماۋعا الۋ ەسكەرتىلگەن.
قاراعاندىدا ساياسي قۋعىن-سۇرگىن قۇرباندارىن ەسكە الۋعا ارنالعان شەرۋدى ۇيىمداستىرعان بەلسەندىنىڭ ءىسى بويىنشا سوت ونى 15 تاۋلىككە اكىمشىلىك قاماۋعا العان. بۇل ارەكەتتى سوت «بەيبىت جيىنداردى ۇيىمداستىرۋ جانە وتكىزۋ ءتارتىبىن بۇزۋ» دەپ باعالاعان.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز