قازاقستاننىڭ بەلگىلى جازۋشىسى، اقىن، جۋرناليست، اۋدارماشى، قوعام قايراتكەرى ادولف ارتسيشەۆسكي 87 جاسىندا دۇنيەدەن ءوتتى. بۇل تۋرالى مادەنيەت جانە اقپارات مينيسترلىگىنىڭ ءباسپاسوز قىزمەتى جاريالادى، دەپ حابارلايدى “ادىرنا”.
“ول ءوز شىعارماشىلىعىندا ادامگەرشىلىك، رۋحانيات پەن تۋعان جەرگە دەگەن سۇيىسپەنشىلىك تاقىرىپتارىن تەرەڭ قوزعاپ، بىرنەشە بۋىن وقىرمانعا وي سالدى. ونىڭ قالامىنان تۋعان تۋىندىلار قازاق جانە ورىس تىلدەرىندە جارىق كورىپ، ادەبي قاۋىمداستىقتىڭ جوعارى باعاسىنا يە بولدى”، — دەلىنگەن مينيسترلىكتىڭ حابارلاماسىندا.
ادولف الفونسوۆيچ ارتسيشەۆسكي 1938 جىلدىڭ 17 قاڭتارىندا پروكوپەۆس (كۋزباسس) قالاسىندا دۇنيەگە كەلگەن. ءومىرىنىڭ باسىم بولىگىن الماتى قالاسىندا وتكىزدى.
ول 1960 جىلى قازمۋ-ءدىڭ جۋرناليستيكا فاكۋلتەتىن، ال 1981 جىلى ماسكەۋدەگى م. گوركي اتىنداعى ادەبيەت ينستيتۋتى جانىنداعى جوعارى ادەبي كۋرستاردى تامامداعان.
ەڭبەك جولىن «جازۋشى» باسپاسىندا رەداكتور بولىپ باستاعان. سونىمەن قاتار «پروستور» جۋرنالىندا تەحنيكالىق رەداكتور، رەسپۋبليكالىق جاس كورەرمەندەر
سونداي-اق ول «قازاقفيلم» ستۋدياسىندا تۇسىرىلگەن العاشقى قازاقستاندىق تەلەحيكايا — «بۇرىلىستىڭ» باس رەداكتورى، ءارى «جاڭا ءداۋىر» جۋرنالىنىڭ باس رەداكتورى بولعان.
ادولف ارتسيشەۆسكي پوەزيا جانە پروزانىڭ 18 كىتابىنىڭ اۆتورى. ول — قازاقستان جازۋشىلار وداعىنىڭ، پەن-كلۋبتىڭ، جۋرناليستەر وداعىنىڭ، تەاتر قايراتكەرلەرى وداعى مەن كينەماتوگرافيستەر وداعىنىڭ مۇشەسى.
سونىمەن قاتار ول قازاق ادەبيەتىن ورىس تىلىنە اۋدارۋدا ەلەۋلى ەڭبەك ءسىڭىردى. اتاپ ايتقاندا، اكىم ءتارازيدىڭ «اياز بەن وراز»، «ديناستيا» پوۆەستەرىن، باققوجا مۇقايدىڭ «اققۋ» پوۆەستەر جيناعىن، قاليحان ىسقاقوۆتىڭ «بەلوۆودە جەرىنىڭ اڭىزى» رومانىن، قاليحان ىسقاقوۆ پەن شاحيماردەن قۇسايىنوۆتىڭ «بۇيرىق كۇشىندە قالادى» پەساسىن جانە دۋلات يسابەكوۆتىڭ «ءىبىلىستىڭ تورى (ميحايل بۋلگاكوۆتىڭ ءومىرى)» پەساسىن ورىس تىلىنە اۋدارعان.
