2025 جىلدىڭ 29 مامىرى مەن 1 ماۋسىمى ارالىعىندا تاشكەنت قالاسىنداعى «جەڭىس ساياباعى» مەموريالدىق كەشەنىندە قورعانىس سالاسىنداعى ەكىنشى يننوۆاتسيالىق تەحنولوگيالار فەستيۆالى – MSITF-2025 ءوتتى. ءىس-شارادا وزبەكستاندا وندىرىلەتىن زاماناۋي قارۋ-جاراق پەن قوسارلى ماقساتتاعى ونىمدەر كوپشىلىككە ۇسىنىلدى، دەپ حابارلايدى “ادىرنا”.
فەستيۆالدىڭ اشىلۋىندا سويلەگەن وزبەكستاننىڭ قورعانىس ءمينيسترى، گەنەرال-مايور شۋحرات حالمۋحامەدوۆ سوڭعى جىلدارى ەلدىڭ قارۋلى كۇشتەرى تۇبەگەيلى جاڭارىپ، اسكەري سالاعا زاماناۋي تەحنولوگيالار بەلسەندى ەنگىزىلىپ جاتقانىن اتاپ ءوتتى. ءمينيستردىڭ ايتۋىنشا، جاڭا اسكەري زاۋىتتار اشىلىپ، بۇرىننان بار ءوندىرىس ورىندارى قايتا جاڭعىرتىلعان. قورعانىس-تەحنيكالىق سالادا 50 ەلمەن ارىپتەستىك ورناتىلىپ، 30-دان استام شەتەلدىك كومپانيالارمەن كەلىسىمدەر جاسالعان. ناتيجەسىندە، شىعارىلاتىن ءونىم ءتۇرى 155 اتاۋعا جەتكەن.
فەستيۆال اياسىندا جاستار اراسىندا بىرقاتار تەحنيكالىق بايقاۋلار ۇيىمداستىرىلدى. ولاردىڭ قاتارىندا «كيبەرسپورت»، «ۇزدىك حاكەر»، «درون جوبالاۋ»، «3D مودەلدەۋ» جانە «روبوتتار شايقاسى» سياقتى باعىتتار بار. بۇل جارىستار جاس مامانداردى اسكەري-ينجەنەرلىك سالالارعا تارتۋ جانە وتاندىق وندىرىستەرگە قىزىعۋشىلىقتى ارتتىرۋ ماقساتىندا وتكىزىلدى.
كورمەدە ەرەكشە ورىن العان – ۇشقىشسىز ۇشۋ اپپاراتتارى (دروندار). وزبەكستاندا جاسالعان Lochin ۇشقىشسىز بارلاۋ كەشەنى 5 000 مەتر بيىكتىكتە 6 ساعات بويى ۇشىپ، 100 كم قاشىقتىقتان باسقارۋعا مۇمكىندىك بەرەدى. ال Samum 80 اتتى درون-كاميكادزە 8 كەلى جارىلعىش زاتتى 140 كم/ساع جىلدامدىقپەن 80 كم قاشىقتىققا جەتكىزە الادى.
سونداي-اق، كورمەدە جەرۇستى دروندار – بارلاۋ ماقساتىنداعى AstroDog جانە جارىلعىش نە گۋمانيتارلىق جۇك تاسىمالداي الاتىن BUSTR پلاتفورماسى دا كوپشىلىككە ۇسىنىلدى.
MSITF-2025 كورمەسىندە العاش رەت جەڭىل اۆياتسيا سالاسىندا جاسالعان بىرەگەي جوبا – ەكى ادامعا ارنالعان شاعىن ۇشاق تانىستىرىلدى. سلوۆاكيالىق Tomark كومپانياسى جانە وزبەكستانداعى سەرىكتەستەرىمەن بىرلەسىپ جاسالعان بۇل ۇشاق 1200 كم قاشىقتىقتى توقتاۋسىز ۇشىپ ءوتىپ، 200 كم/ساع جىلدامدىقپەن قوزعالا الادى. قۇنى – شامامەن 300 مىڭ اقش دوللارى.
اۋىر اسكەري تەحنيكالار دا كورمەدەن تىس قالعان جوق. ت-64 تانكىسى جاڭا قوزعالتقىشپەن جابدىقتالىپ، 125 مم زەڭبىرەكپەن تولىقتىرىلدى. سونىمەن قاتار، Arslon برونەترانسپورتەرلەرى مەن جاڭارتىلعان بم-21 «بۋرون» رەاكتيۆتى جۇيەسى كورسەتىلدى.
ۇيىمداستىرۋشىلاردىڭ ايتۋىنشا، فەستيۆالدىڭ باستى ماقساتى – قورعانىس سالاسىنداعى يننوۆاتسيالىق دامۋدى كورسەتۋ جانە جاستاردى زاماناۋي اسكەري-تەحنيكالىق ماماندىقتارعا تارتۋ. وزبەكستان اسكەري دوكتريناسىنىڭ قورعانىستىق سيپاتتا ەكەنى دە رەسمي تۇردە ەسكەرتىلدى.
