شەكاراداعى داعدارىس. قاپلانبەك بەكەتىندە كولىك كەپتەلىسى كۇشەيدى

ماۋسىم ايىنىڭ باسىندا قازاقستان مەن وزبەكستان اراسىنداعى شەكارا بەكەتتەرىندە كەپتەلىس قالىپتاستى، دەپ حابارلايدى “ادىرنا” ۇلتتىق پورتالى. جۇرگىزۋشىلەر ءبىر تاۋلىكتەن اسا ۋاقىت شەكارادان وتە الماي تۇرعاندارىن، كۇننىڭ ىستىعى مەن قاجەتتى جاعدايلاردىڭ جوقتىعى قولايسىزدىق تۋعىزعانىن ايتۋدا. كەپتەلىستىڭ باستى سەبەبى – 6 ماۋسىمدا  تويلاناتىن قۇربان ايت مەرەكەسىنە بايلانىستى حالىق قوزعالىسىنىڭ ارتۋى. وسىعان وراي شەكارادان وتۋشىلەردىڭ سانى كوبەيىپ، جۇكتەمە بىرنەشە ەسەگە ارتقان. بۇعان قوسا، باسقا بىرنەشە وتكىزۋ بەكەتتەرىنىڭ ۋاقىتشا جابىلۋى سەبەپتى كولىك پەن جۇك اعىنى قاپلانبەك، ياللاما سەكىلدى بەكەتتەرگە باعىتتالعان. ەڭ ۇلكەن ماسەلە – شەكاراداعى ەڭ ءىرى جانە قولايلى «جىبەك جولى – گيشتكۋپريك» (بۇرىنعى چەرنياەۆكا) بەكەتىنىڭ جوندەۋ جۇمىستارىنا بايلانىستى ۋاقىتشا جابىلۋى. بۇل بەكەت تاۋلىك بويى جۇمىس ىستەيتىن، كولىك، جولاۋشىلار مەن پويىزداردى وتكىزەتىن باستى وتكەلدەردىڭ ءبىرى بولاتىن. قازىر ونىڭ جابىلۋى سالدارىنان بارلىق جۇكتەمە قاپلانبەك – ناۆوي بەكەتىنە ءتۇستى. الايدا بۇل وتكىزۋ پۋنكتى تەك جاياۋ جۇرگىنشىلەر ءۇشىن جۇمىس ىستەيدى جانە تەك كۇندىزگى ۋاقىتتا عانا اشىق بولعاندىقتان، كولىك تاسىمالىنا مۇلدەم جاراماي وتىر. تاعى ءبىر وتكىزۋ بەكەتى – قازىعۇرت – مايسكي – تەك جۇك كولىكتەرىنە ارنالعان. بىراق ونىڭ وتكىزۋ مۇمكىندىگى قازىرگى جاعدايعا سايكەس كەلمەيدى. ال ياللاما شەكارا بەكەتى تاشكەنتتەن الىس ورنالاسقاندىقتان، جاعدايدى جەڭىلدەتە الماي وتىر. وزبەكستاننىڭ كەدەن كوميتەتى ياللامادا قوسىمشا قىزمەتكەرلەر جۇمىسقا تارتىلعانىن جانە راسىمدەۋ ۇدەرىسىن جەدەلدەتۋ شارالارى قولعا الىنعانىن حابارلادى. جۇرگىزۋشىلەر مەن ساراپشىلار شەكاراداعى ينفراقۇرىلىمنىڭ مەرەكە كەزىندەگى جۇكتەمەنى كوتەرە الماي جاتقانىن ايتىپ،  ماسەلەنى جۇيەلى تۇردە شەشۋ قاجەتتىگىن العا تارتۋدا. ۇقساس جاعداي قازاقستاننىڭ رەسەيمەن شەكاراسىندا دا تىركەلۋدە. ەلدىڭ باتىسىنداعى وتكىزۋ بەكەتتەرىندە جۇك كولىكتەرىنىڭ 10 شاقىرىمدىق كەزەگى پايدا بولعان. جۇرگىزۋشىلەر ول جاقتا دا بىرنەشە تاۋلىك بويى كەزەكتە تۇرۋعا ءماجبۇر. ساراپشىلار قولدانىستاعى شەكارا بەكەتتەرىن جاڭعىرتۋ جانە جاڭا وتكىزۋ پۋنكتتەرىن اشۋ قاجەتتىگىن ءجيى ايتىپ ءجۇر. سەبەبى قازاقستان مەن وزبەكستان اراسىنداعى ساۋدا-ساتتىق پەن حالىقتىڭ قوزعالىسى جىل سايىن ارتىپ كەلەدى. 2025 جىلدىڭ ناۋرىز ايىندا وزبەكستان، قىرعىزستان جانە تاجىكستان پرەزيدەنتتەرى شەكارا ينفراقۇرىلىمىن جەتىلدىرۋ جانە لوگيستيكالىق حابتار قۇرۋ ماسەلەسىن تالقىلاعان بولاتىن. قازىرگى جاعدايعا بايلانىستى رەسمي ورگاندار تاراپىنان ناقتى مالىمدەمە جاسالعان جوق. ال جۇرگىزۋشىلەر بيلىكتەن شۇعىل شەشىمدەر قابىلداپ، شەكاراداعى كەزەكتەردى ازايتۋدى تالاپ ەتۋدە.