قىرعىزستاننىڭ وش قالاسىندا لەنينىڭ ورتالىق ازياداعى ەڭ بيىك ەسكەرتكىشى رەسمي تۇردە الىنىپ تاستالدى، دەپ حابارلايدى "ادىرنا" ۇلتتىق پورتالى.
الەۋمەتتىك جەلىلەردە جەرگە قۇلاتىلعان ەسكەرتكىشتىڭ سۋرەتتەرى تاراپ، جۇرتشىلىقتىڭ نازارىن اۋداردى. بەلگىلى بولعانداي، ەسكەرتكىش 7 ماۋسىم كۇنى قالا اكىمدىگىنىڭ شەشىمىمەن دەمونتاجدالعان.
وش قالاسى اكىمدىگىنىڭ ءباسپاسوز قىزمەتى حابارلاعانداي، لەنيننىڭ ورنىنا بيىكتىگى 95 مەتر بولاتىن الىپ تۋ كوتەرگىش ورناتىلادى. ال ەسكەرتكىشتىڭ ءوزى قالاداعى ساياباقتاردىڭ بىرىنە كوشىرىلمەك.
قالا اكىمدىگىنىڭ ايتۋىنشا، مۇنداي وزگەرىستەر رەسەي قالالارىندا دا جۇزەگە اسىرىلىپ جاتىر.
«مىسالى، سانكت-پەتەربۋرگ پەن بەلگورودتا دا لەنين ەسكەرتكىشتەرى بۇزىلىپ
نەمەسە باسقا ورىندارعا كوشىرىلدى. بۇل — قالالاردىڭ ارحيتەكتۋرالىق جانە ەستەتيكالىق كەلبەتىن جاقسارتۋ ماقساتىنداعى قالىپتى تاجىريبە»، — دەلىنگەن مەر مالىمدەمەسىندە.
وشتاعى 25 مەترلىك لەنين ەسكەرتكىشى 1975 جىلى ورناتىلعان. سوڭعى بىرنەشە جىل بويى ول تۇرعىندار اراسىندا قىزۋ پىكىرتالاس تۋدىرىپ كەلگەن. ءبىر تاراپ ونى تاريحي-مادەني مۇرا رەتىندە ساقتاپ قالۋدى جاقتاسا، ەندى ءبىر تاراپ قالا كوركىنە ساي كەلمەيتىنىن ايتىپ، بۇزۋدى تالاپ ەتكەن.
ايتا كەتەيىك، قىرعىزستان استاناسى بىشكەكتە دە لەنين ەسكەرتكىشى ءوز ورنىنان الىنىپ، قالا ىشىندەگى باسقا ورىنعا كوشىرىلگەن.
