قوبدا اۋىلىندا ءاليا مولداعۇلوۆانىڭ 100 جىلدىعى دۇركىرەپ ءوتتى

600
Adyrna.kz Telegram
https://adyrna.kz/content/uploads/2025/06/907f7dae-00fd-4d2f-871a-afa1ee46549e.jpeg

قازاقتىڭ مەرگەن قىزىنىڭ مەرەيتويىنا 80 كيىز ءۇي قۇرىلدى، وسىلايشا ەتنواۋىل بوي كوتەردى. عاسىرلىق تويعا جينالعان قوناقتار قازاقتىڭ ۇلتتىق ويىندارىن تاماشالاپ، التىباقاندا ويناپ، قازاقتىڭ ۇلتتىق تاعامدارىنان ءدام تاتتى. 

بيىل كەڭەس وداعىنىڭ باتىرى، قازاقتىڭ مەرگەن قىزى ءاليا مولداعۇلوۆانىڭ تۋعانىنا - 100 جىل. ۇلى ەسىمدى ۇلىقتاۋ ماقساتىندا اقتوبە وڭىرىندە جىل باسىنان بەرى مادەني-تانىمدىق، رۋحاني شارالار ۇيىمداستىرىلىپ جاتىر. ەڭ اۋقىمدىسى 12 جانە 13 ماۋسىم كۇندەرىنە جوسپارلانعان.

بۇگىن قوبدا جەرىندە «ءاليا - قاھارماندىق داستانى» اتتى كەڭ كولەمدى ءىس-شارا ۇيىمداستىرىلدى. مەرەيتويعا قر پرەزيدەنتىنىڭ كەڭەسشىسى مالىك وتارباەۆ، وبلىس اكىمى اسحات شاحاروۆ، باتىردىڭ تۋىستارى مەن وزگە دە مارتەبەلى مەيماندار قاتىستى. 

ايماق باسشىسى كوپشىلىكتى ۇلت ماقتانىشىنىڭ مەرەيتويىمەن قۇتتىقتادى.

«قوبدا ءوڭىرى - تالاي باتىر مەن تۇلعالاردى دۇنيەگە اكەلگەن قاسيەتتى مەكەن. سولاردىڭ ىشىندە ءاليانىڭ ورنى ەرەكشە. ءاليا اپامىزدىڭ ەرلىگى - بۇگىنگى ۇرپاق ءۇشىن بيىك رۋحتىڭ، جىگەردىڭ، ءپاتريوتيزمنىڭ ناعىز ۇلگىسى. ونىڭ ەسىمى تاريح بەتتەرىندە التىن ارىپپەن جازىلىپ، حالقىمىزدىڭ جۇرەگىندە ماڭگى ساقتالادى.

بۇگىنگى ءىس-شارا وتكەنگە تاعزىم، ەرلىككە كورسەتىلگەن قۇرمەت. بۇل - جاس ۇرپاققا ۇلگى بولارلىقتاي، ولاردىڭ بويىنا وتانسۇيگىشتىك پەن ادامگەرشىلىك قاسيەتتەردى ءسىڭىرۋ جولىنداعى ماڭىزدى شارا»، - دەدى وبلىس اكىمى. 

قر پرەزيدەنتىنىڭ كەڭەسشىسى مالىك وتارباەۆ قاتىسۋشىلاردى مەملەكەت باسشىسى قاسىم-جومارت توقاەۆتىڭ اتىنان ايتۋلى كۇنمەن قۇتتىقتاپ، ءاليا مولداعۇلوۆانىڭ ەرلىگىن ۇرپاق جادىندا ماڭگى قالدىرۋعا اتسالىسىپ جۇرگەن جاندارعا العىسىن ءبىلدىردى.

قوناقتار ءاليا مولداعۇلوۆانىڭ ءومىرى مەن ەرلىگى ورنەكتەلگەن تەاترلاندىرىلعان كورىنىستى تاماشالادى. بۇلاقتا تۋىپ وسكەن قارشاداي قازاق قىزىنىڭ عۇمىرى ساحنالىق قويىلىمدا ەرەكشە بەينەلەنگەن.

سپەكتاكل تاريحتى عانا ەمەس، باتىر قىزدىڭ بويىنداعى وتانعا دەگەن سۇيىسپەنشىلىكتى، ەرلىك پەن ەلدىكتى، رۋح پەن كۇشتى ايىرىقشا كورسەتتى. 

مەرەكەلىك كوڭىل-كۇي كونتسەرتتىك باعدارلامامەن جالعاستى. عازيزا جۇبانوۆا اتىنداعى وبلىستىق فيلارمونيا ارتىستەرى مەن قوبدالىق ونەرپازداردىڭ جارقىن نومىرلەرى كورەرمەنگە ەرەكشە اسەر سىيلادى.

وبلىس اكىمى اسحات شاحاروۆ پرەزيدەنت كەڭەسشىسى مالىك وتارباەۆپەن بىرگە ەتنواۋىلداعى ءاليا مولداعۇلوۆا، مانشۇك مامەتوۆا جانە حيۋاز دوسپانوۆانىڭ ءومىر تاريحىنان ءتۇرلى دەرەكتەر قامتىلعان كوشپەلى مۋزەي-كيىز ۇيگە كىرىپ شىقتى. سونداي-اق، ۇلتتىق سپورت تۇرلەرى – بايگە مەن قازاق كۇرەسىندە باق سىناعان سپورتشىلاردىڭ شەبەرلىگىن تاماشالادى.

ايتىپ وتەيىك، 7 شاقىرىمدىق قۇنان بايگەدە تۇركىستان وبلىسى سوزاق اۋىلىنان كەلگەن شاباندوز مارەگە ءبىرىنشى جەتسە، ويىل اۋدانى - ەكىنشى، شالقار اۋدانى - ءۇشىنشى ورىندى يەلەندى. 

شاراداعى جىلى اتموسفەراعا، كورسەتىلگەن قۇرمەتكە جانە باتىر ەسىمىن ۇلىقتاپ، ەسكە العان ساتتەرگە ءاليانىڭ تۋىستارى رازى.

«اكەم ءاليانى ءجيى ەسكە الاتىن. ول بالا كەزىنەن-اق باسقا بالالاردان ەرەكشەلەنەتىنىن ايتاتىن. ءاليا شاپشاڭ، جاۋاپكەرشىلىگى مول، بىلىمگە قۇشتار بولعان. اكەم ونىڭ قامقورلىعى مەن مەيىرىمدىلىگىن ۇنەمى ايتىپ وتىراتىن. جاسىنا قاراماستان، ول وزگەلەرگە جاناشىرلىق تانىتىپ، كومەكتەسە بىلگەن ەكەن. ءبىز ول تۋرالى ۇزاق تەبىرەنە الامىز — ءاليانىڭ بويىندا شەكسىز جىلۋلىق، قۋات، رۋح كۇشى بار ەدى. ول ءبىزدىڭ وتباسىمىزدىڭ جادىندا وشپەس ءىز قالدىردى. ول ءبىز ءۇشىن جاي عانا باتىر ەمەس، ول — وتباسىمىزدىڭ ءبىر بولشەگى، ماقتانىشىمىز، جان جارامىز جانە ماڭگىلىك ساعىنىشىمىز»، - دەيدى ءاليا مولداعۇلوۆانىڭ اعاسى بيسەمباي حابيەۆتىڭ قىزى اريا حابيەۆا. 

پىكىرلەر