ءماجىلىس دەپۋتاتى داۋلەت مۇقاەۆ قارجىلىق پيراميدالار مەن ينتەرنەت الاياقتارعا الدانداعاندار جونىندە باس پروكۋرور بەرىك اسىلوۆقا دەپۋتاتتىق ساۋال جولدادى، دەپ حابارلايدى "ادىرنا" پورتالى.
كەزەكتى ءماجىلىس وتىرىسىندا داۋلەت مۇقاەۆ 5 مىڭ ادامنىڭ 30 ميلليارد اقشاسىن جىمقىرعان ايس مۋراتوۆا (شىن اتى - ارايلىم) ەسىمدى ايەلدىڭ ءىسىن پروكۋراتۋرا ءجىتى قاراۋىن باسا ايتتى. سونشا ادامدى الداپ سوققان ودان ءبارىن كۇتۋگە بولادى دەيدى ول.
"قىتايدان ارزان تاۋار اكەلەمىن دەپ، ەلدى سەندىرگەن ايس مۋراتوۆاعا (شىن اتى ارايلىم) الدانعاندار سانى 5000-نان اسادى. ايسقا سەنىپ، پەرەۆودپەن كەتكەن اقشا كولەمى 30 ميللياردقا جەتىپ وتىر. ويلاڭىزدارشى، ەلدە 10 مەكتەپ سالۋعا بولاتىن اقشا! نەمەسە ورتا ەسەپپەن 2000 پاتەردىڭ اقشاسى!!! مەن تەك چەك جينالعان 3-4 پاپكانى كورسەتتىم. بۇنداي 3 پاكەت بار!
ادىلەتتى قازاقستان دەسەك، تەرگەۋ جۇمىستارى ادىلەتتى ءجۇرۋ كەرەك. ءارى بۇل ءىس باس پروكۋروردىڭ ءجىتى باقىلاۋىندا بولۋ كەرەك. سول سەبەپتى دە دەپۋتاتتىق ساۋال جولدادىم. سەبەبى الدانعان قاراپايىم حالىق ايس جازاسىز قالا ما دەپ قورقادى! 30 ميلليارد اقشاعا سۋديانى دا ساتىپ الۋى مۇمكىن!" دەپ اتاپ ءوتتى داۋلەت مۇقاەۆ.
ەسكە سالا كەتەيىك، ءىىم بيىلعى توعىز ايدا ەلىمىزدە 15 مىڭنان استام ينتەرنەت-الاياقتىق فاكتىلەرى تىركەلگەنىن حابارلادى. وسى ساناتتاعى 3 مىڭعا جۋىق قىلمىستى جاساۋعا قاتىسى بار 596 ادام قىلمىستىق جاۋاپكەرشىلىككە تارتىلدى.
