بۇگىندە تاراز قالاسىندا تۇرعىن ۇيلەردى جاڭعىرتۋعا باسا دەن قويىلۋدا. تۇرعىن ءۇي-كوممۋنالدىق ينفراقۇرىلىمدى دامىتۋدىڭ 2023-2029 جىلدارعا ارنالعان تۇجىرىمداماسى بويىنشا بيىل 53 كوپپاتەرلى تۇرعىن ءۇيدى جاڭعىرتۋ جوسپارلانعان بولاتىن.
قازىرگى تاڭدا اتالعان نىسانداردا 23 مەردىگەر مەكەمە تاراپىنان جوندەۋ جۇمىستارى قارقىندى جۇرۋدە. جاڭعىرتۋ جۇمىستارى بيىلعى قاراشا ايىنىڭ سوڭىنا دەيىن تولىعىمەن اياقتالادى دەپ كوزدەلۋدە. تاعى ءبىر ايتا كەتەرلىگى، قۇرىلىس جۇمىستارىنا جۇمسالعان قاراجاتتى قايتارۋ، كوندومينيۋم وبەكتىسىندە ورنالاسقان پاتەر اۋدانىنا ساي، ءار پاتەر يەسىنە پروپورتسيونالدى تۇردە ەسەپتەلىپ، قايتارىم مەرزىمى ون بەس جىل بولىپ بەلگىلەنگەن.
بيىل بۇعان قوسا «ينتەرستروي ازيا» جشس تاراپىنان تولە بي كوشەسىندە ورنالاسقان №11, «تۇرعىن ءۇي جوندەۋ»، «ابىروي ينۆەست» جانە «TarazGazNur» جشس مەردىگەرلىگىمەن «قاراتاۋ» ىقشاماۋدانى، №37 «ا»، №39 جانە «سالتانات» ىقشاماۋدانى، №29 «ا»، №29 «ب» جاتاقحانالارىنا جوندەۋ جۇمىستار جۇرگىزىلۋدە.
بۇدان بولەك، كوممۋنالدىق مەنشىكتە تۇرعان «بايتەرەك» ىقشاماۋدانىنداعى №5, 8, 12, 14, 31, 39 ۇيلەرگە «ارقاس-ا»، «يۋگ-تەحسناب» جشس مەردىگەرلىگىمەن قۇرىلىس جۇمىستارى قولعا الىندى.
بيىل تەك ىقشاماۋداندار عانا ەمەس، ورتالىقتاعى ۇيلەرگە دە باسىمدىق بەرىلۋدە. سونىڭ ايقىن ايعاعى – «قاراتاۋ قۇرىلىس 2030» جشس مەردىگەرلىگىمەن تولە بي داڭعىلىندا ورنالاسقان №38, 40, 44, 48, 50, 52, 54, 56, 57, 58, 59, جالپى سانى 11 كوپپاتەرلى تۇرعىن ءۇيدىڭ قاسبەتتەرى، شاتىرلارى كۇردەلى جوندەۋدەن وتۋدە.
