قىرعىزستان پرەزيدەنتى سادىر جاپاروۆ ءوزىنىڭ پورترەتىن مەملەكەتتىك عيماراتتارعا، جۇمىس كابينەتتەرىنە ىلمەۋدى ءوتىندى. بۇل تۋرالى مەملەكەت باسشىسىنىڭ ءباسپاسوز حاتشىسى گالينا بايتەرەك مالىمدەدى.
«پرەزيدەنت سادىر جاپاروۆ قازىر ەلدىڭ جاعدايىن جاقسارتۋ ءۇشىن ەشتەڭە ىستەمەدىم دەپ ەسەپتەيدى. سوندىقتان پرەزيدەنت بارلىق مەملەكەتتىك ورگاندارعا پورترەتىن ىلمەۋدى سۇراپ جاتىر. پورترەت ىلگىسى كەلگەندەر جۋسۋپ ابدراحمانوۆ، يسحاك راززاكوۆ سياقتى ەلدى نىعايتۋعا قىزمەت ەتكەن مەملەكەتتىك قايراتكەرلەردىڭ سۋرەتىن ىلۋگە بولادى»، – دەدى بايتەرەك.
بۇدان بۇرىن پرەزيدەنتتىڭ وشتاعى رەزيدەنتسياسىنىڭ ديرەكتورى سانجاربەك تولونباەۆ سادىر جاپاروۆتىڭ كىلەمگە توقىلعان سۋرەتىن كابينەتىنە ءىلىپ العانى الەۋمەتتىك جەلىلەردە قىزۋ تالقىلانعان ەدى. سانجاربەك تولونباەۆ كىلەم جاپاروۆ اباقتىدا وتىرعاندا توقىلعانىن ايتقان.
