قازاقستاندا بۇرىنعى پرەزيدەنت نۇرسۇلتان نازارباەۆتى تيىسپەۋشىلىك مارتەبەسىنەن ايىرۋ تۋرالى پەتيتسياعا قول جيناۋ باستالدى. 19 قاڭتارداعى مالىمەت بويىنشا، وعان قول قويعاندار 2 مىڭعا جۋىقتادى.
پەتيتسيا اۆتورى وندا "تۇڭعىش پرەزيدەنت تۋرالى" زاڭعا سايكەس، نۇرسۇلتان نازارباەۆقا قانداي ارتىقشىلىقتار بەرىلگەنىن ەسكە سالعان:
- نازارباەۆتى ۇستاۋعا قاماۋعا، تىنتۋگە، تەرگەۋگە بولمايدى، وعان جانە وتباسىنا تيەسىلى مۇلىكتەرگە قول سۇعۋعا تىيىم سالىنعان;
- نازارباەۆ پەن وتباسى ءومىر بويى كۇزەتىلەدى، ەكس-پرەزيدەنتتىڭ ءومىرى مەن دەنساۋلىعى ساقتاندىرىلعان;
- وعان پرەزيدەنت جالاقىسىنىڭ 80 پايىزىنا تەڭ زەينەتاقى تولەنەدى، ونىمەن بىرگە تۇرعان وتباسى مۇشەسىنىڭ ارقايسىسىنا اي سايىن جاردەماقى تولەنەدى;
"ەركىن دەموكراتيالىق قوعام قۇرعىسى كەلەتىن قازاقستاندا مۇنداي ارتىقشىلىقتارعا جول بەرۋگە بولمايدى دەپ سانايمىز. بۇعان قوسا، نازارباەۆ وتباسى مەن تۋىستارىنىڭ تابىس كوزى كۇماندى. مۇنىڭ بارلىعى زاڭدى جانە وبەكتيۆتى زەرتتەلۋى ءتيىس، الايدا بۇل جوعارىدا اتالعان زاڭعا ( "قازاقستان رەسپۋبليكاسىنىڭ تۇڭعىش پرەزيدەنتى - ەلباسى" تۋرالى زاڭ – رەد.) قايشى. اتالعان زاڭنىڭ كۇشىن جويۋدى تالاپ ەتەمىز" دەلىنگەن پەتيتسيادا.
ساراپشىلار كەيىنگى كەزدە جۇرت الدىنا كورىنبەي كەتكەن، 18 قاڭتاردا عانا ۆيدەومالىمدەمە جاساپ، ەلدەگى وقيعالارعا پىكىرىن بىلدىرگەن نۇرسۇلتان نازارباەۆتىڭ ىقپالى السىرەگەنىن ايتادى. سوڭعى ۋاقىتتا ونىڭ جاقىندارى مەن وعان جاقىن شەنەۋنىكتەر بىرىنەن-سوڭ ءبىرى قىزمەتتەرىنەن كەتىپ جاتىر. بۇعان دەيىن نازارباەۆتىڭ ءوزىنىڭ دە قازاقستاننان تىس جەردە ەكەنى ايتىلعان. بىراق بۇل رەسمي تۇردە راستالمادى.
قازاقستاندا 2 قاڭتاردا باستالعان نارازىلىق شارالارى شامامەن ءبىر اپتاعا سوزىلدى. وعان سۇيىتىلعان گازدىڭ قىمباتتاۋى سەبەپ بولعان. نارازىلار وزگە تالاپتارمەن بىرگە وتستاۆكاعا كەتسە دە، ساياسي ىقپالىن ساقتاپ قالعان 81 جاستاعى نۇرسۇلتان نازارباەۆتىڭ بيلىكتەن تولىق كەتۋىن دە تالاپ ەتكەن. نارازىلىقتىڭ سوڭى قازاقستاننىڭ تاۋەلسىزدىك تاريحىندا بۇرىن-سوڭدى بولماعان ءىرى تارتىپسىزدىككە ۇلاستى.
پەتيتسياعا مىنا سىلتەمەگە كىرۋ ارقىلى قول قويا الاسىز:
https://egov.press/1162-peticija-trebuem-otmeny-zakona-rk-o-pervom-prezidente.html
azattyq.org
باسقالارمەن بولىسە
وتىرىڭىز
