ەۋروپا پارلامەنتىنىڭ قازاقستانداعى احۋال تۋرالى قارارى مەزگىلىنەن بۇرىن، اسىعىس قابىلدانعان. ءماجىلىس دەپۋتاتى ءزۇلفيا سۇلەيمەنوۆا وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«ءبىز قازىر تەرگەۋ قورىتىندىسىن كۇتىپ وتىرمىز. سول تەرگەۋ ناتيجەسى جاعدايدى تەرەڭىرەك اشىپ، شىن مانىندە نە بولعانى تۋرالى قوسىمشا اقپارات پەن تۇسىنىك قالىپتاستىرۋى كەرەك. سوندىقتان ەۋروپارلامەنتتىڭ بۇل قارارىن اسىعىس شەشىم دەپ ەسەپتەيمىن. وكىنىشكە قاراي، ەۋروپالىق پارلامەنتتەگى ارىپتەستەرىمىزدىڭ بىزبەن بايلانىسپاعانى شىنىمەن دە الاڭداتادى. مەندە ەۋروپارلامەنت وكىلدەرىنىڭ ادام قۇقىقتارى جونىندەگى ۋاكىلدەرمەن، قازىر ازاماتتاردىڭ قۇقىقتارىن قورعاپ جۇرگەن ازاماتتىق قوعام وكىلدەرنە دە حابارلاسپاعانى تۋرالى مالىمەت بار. سىرتقى ىستەر مينيسترلىگىنىڭ ۇستانىمىن بىلدىرەتىن اقپاراتتا دا سولاي جازىلعان. الايدا سىرتقى ىستەر مينيسترلىگى بەرگەن رەسمي اقپارات ەلەۋسىز قالدى. وسىنىڭ ءبارى تۇسىنىكسىزدىك تۋىنداتىپ وتىر. سوعان قاراماستان، ءبىز ءالى دە كۇش سالىپ، قاجەتتى ديالوگ ورناتا الامىز»، - دەدى ءزۇلفيا سۇلەيمەنوۆا قازاقپارات تىلشىسىنە.
دەپۋتات قاڭتار تراگەدياسى تۋرالى قانداي دا ءبىر مالىمدەمە جاساماي تۇرىپ ەڭ الدىمەن جاپپاي تارتىپسىزدىكتى تەرگەۋ قورىتىندىسىن كۇتۋ قاجەت دەپ ويلايدى.
«ءبىز ءماجىلىس دەپۋتاتتارى رەتىندە وسى ماسەلەلەر بويىنشا شەتەلدىك ارىپتەستەرىمىزبەن ديالوگ جۇرگىزۋگە دايىنبىز»، - دەدى ءزۇلفيا سۇلەيمەنوۆا.
دەپۋتاتتىڭ پايىمداۋىنشا، قاراردا كورىنىس تاپقان بىرقاتار ماسەلەلەر بويىنشا تەرگەۋلەردىڭ قورىتىندىسىن كۇتۋ كەرەك.
«بۇل شەشىم مەرزىمىنەن بۇرىن قابىلدانعانىن ايتۋعا ءماجبۇرمىن. ويتكەنى ونى قابىلداۋ كەزىندە پايدالانىلعان اقپارات پەن تۇجىرىمدار ءالى ناقىتلانباعان. تەرگەۋ قورىتىندىسىن نەگىزگە الماي جاعدايدى باعالاۋ وتە قيىن. سونىمەن قاتار، ەۋروپارلامەنتتە دە ەلدەگى قايعىلى وقيعالاردى تولىق باعالاۋ ءۇشىن تەرگەۋ قورىتىندىسىن كۇتۋ قاجەت ەكەنىن ايتقان جەكەلەگەن دەپۋتاتتار بولدى. دەگەنمەن، كەيبىر دەپۋتاتتار دالەل جەتكىلىكتى دەپ شەشتى»، - دەيدى ءماجىلىس وكىلى.
سونداي-اق، ءزۇلفيا سۇلەيمەنوۆا قازاقستاننىڭ ادام قۇقىقتارىن ساقتاۋعا بارىنشا مۇددەلى ەكەنىن ەسكە سالدى.
«مەملەكەت باسشىسى دا قازاقستان ادام قۇقىقتارىن قورعاۋ جونىندەگى مىندەتتەمەلەرىن بەرىك ۇستاناتىنىن اتاپ ءوتتى. سونىمەن قاتار، پرەزيدەنت ۇسىنعان بارلىق ساياسي رەفورمالار جالعاسادى. ادام قۇقىقتارىن بىرتىندەپ دەموكراتيالاندىرۋ، جاڭعىرتۋ جانە ساقتاۋ باعىتىن ەلىمىز مىعىم ۇستانىپ كەلەدى. بۇل - ماڭىزدى ماسەلە. ءسوز جوق، ءبىز ءۇشىن ادام قۇقىقتارى، ادام قۇقىقتارىن ساقتاۋ، قوعامدى دەموكراتيالاندىرۋ ماسەلەلەرى كۇن تارتىبىندەگى ەڭ ماڭىزدى تاقىرىپ بولىپ قالا بەرەدى»، - دەدى ءماجىلىس دەپۋتاتى.
