قىرعىزستان مەن تاجىكستان اراسىنداعى ساياسي احۋال تۋرالى پارلامەنت ءماجىلىسىنىڭ دەپۋتاتى ايدوس سارىم پىكىر ءبىلدىردى، دەپ حابارلايدى «ادىرنا» ءتىلشىسى baq.kz-كە سىلتەمە جاساپ.
ەكى ەل اراسىنداعى شيەلەنىسۋدىڭ باستى سەبەبى - شەكارا ماسەلەسىنىڭ انىقتالماعاندىعى. قىرعىزستان مەن تاجىكستان ەلدەرى اراسىندا كوپتەگەن شەكارا ۋچاسكەلەرى قانشاما جىل وتسە دە ءبىر كەلىسىمگە كەلمەگەن. سونداي-اق ءبىر مەملەكەت ىشىندە ەكىنشى ەلدىڭ ازاماتتارىنىڭ بولۋى. ەكى ەلدىڭ ىشىندە دە قىرعىز نە تاجىك ازاماتتارى بار، ولاردىڭ ءوز مەملەكەتىمەن قارىم-قاتىناسى، تۇراقتى جۇمىس ورىندارى بار، بۇل اينالىپ كەلگەندە ساياسي پروبلەماعا اينالدى، - دەدى ساياساتتانۋشى.
ايدوس سارىمنىڭ اتاپ وتۋىنشە، قىزعىزستان مەن تاجىكستان اراسىنداعى ۋشىققان ماسەلەنىڭ ءبىرى - سۋ پروبلەماسى.
بۇل ەلدەردە سۋ ماسەلەسىنىڭ بارى بارىمىزگە ءمالىم. ونىڭ تۇراقتى شەشىلمەۋى وسىنداي كونفليكتكە اكەلىپ وتىر. مەنىڭ ويىمشا، بۇعان تۇبەگەيلى شەشىم قاجەت. جانە قازىرگى تاڭدا ەشبىر ەلدىڭ ساياسي ەليتاسى ەكى ەل اراسىنداعى ماسەلەنى شەشۋدە بەلسەندىلىگى جوق. سول سەبەپتى ماڭايىنداعى مەملەكەتتەردىڭ قانداي دا وتە كۇردەلى شەشىمگە بارۋعا قۇلقىنى جوق. ەشبىر ەل مىنا ەلدىڭ جاعدايىن ىمىراعا كەلتىرەيىك دەيتىن مۇمكىندىگى بولماي وتىر، - دەدى ايدوس سارىم.
ساراپشىنىڭ سوزىنشە، ەگەر ساياسي قاقتىعىس جالعاسا بەرەتىن بولسا سالدارى قازاقستانعا دا ءتيۋى مۇمكىن.
ەكى ەلدىڭ ىشىندە دە پاتريوتتارى مەن باسشىلارى بار. وسىدان پايدا كورىپ جۇرگەن كريمينالدى توپتار دا بولۋى مۇمكىن. بۇل شيەلەنىسۋ ەرتە مە، كەش پە ۇزاقمەرزىمدى اسكەري قاقتىعىسقا اپارۋى دا عاجاپ ەمەس. وسىعان دەيىنگىنىڭ ءبارىن جانجال دەپ كەلدىك. الايدا بولاشاقتا ۇلكەن سوعىسقا دا بارۋى مۇمكىن. قازىر كەز كەلگەن فورماتتى پايدالانىپ، ەكى ەلدىڭ اراسىنداعى ماسەلەنى تۇبەگەيلى شەشۋگە كۇش سالۋ كەرەك. قىرعىزستان مەن تاجىكستاننىڭ ەليتالارىن ناقتى ساياسي ىمىراعا شاقىرۋ قاجەت. ءبىز جاعدايدىڭ ءبىر كۇننىڭ ىشىندە وزگەرە سالاتىنىن بايقاپ وتىرمىز، - دەدى پارلامەنت ءماجىلىسىنىڭ دەپۋتاتى.
«ادىرنا» ۇلتتىق پورتالى
