2022 جىلدىڭ 26 قاڭتارىندا «ايقىن» گازەتىنىڭ سايتىندا «الماتىداعى «التىن وردا» بازارى تاراتىلدى» دەگەن اقپارات جاريالاندى (https://stan.kz/almatidagi-altin-orda-bazari-taratildi) اقپاراتتىڭ راس-وتىرىگىن بىرگە تەكسەرىپ كورەيىك.
مۇندا مىناداي جولدار بار: «سوت قۇجاتىنا سايكەس، جشس ۇزاق ۋاقىت بويى سالىق زاڭناماسىندا كوزدەلگەن مىندەتتەمەلەردى ورىنداماعان. الايدا سوت وتىرىسىنا كومپانيا وكىلى قاتىسقان جوق. وسىلايشا، سوت تالاپ ارىزدى قاناعاتتاندىرۋعا شەشىم قابىلدادى. pk.adata.kz. اقپاراتى بويىنشا «التىن وردا بازارى» جشس 2022 جىلدىڭ 24 قاڭتارىندا تاراتىلدى».
ۇكىم: مانيپۋلياتسيا جانە كليكبەيت
«التىن وردا» بازارى الماتى وبلىسىنىڭ اۋماعىندا ورنالاسقان. بىراق الماتى قالاسىن ازىق-تۇلىكپەن، ەت-ءسۇت ونىمدەرىمەن قامتاماسىز ەتەتىن ەڭ ءىرى ساۋدا ورتالىعى. ءارى ەلىمىزدىڭ باسقا وڭىرلەرىنە دە تاۋار جىبەرىلەدى.
بۇل جەردە مانيپۋلياتسيا بەلگىسى بار. تاقىرىپتا كليكبەيت ءادىسى پايدالانىلعان. «التىن وردا» بازارى تاراتىلدى دەگەننەن كەيىن وقىرمان بازار تارادى دەپ تۇسىنەتىنى انىق. ال شىن مانىندە بازار يەسى سانالاتىن سەرىكتەستىك تاراعان. ال بازار جۇمىس ىستەپ تۇر.
"ادىرنا" ۇلتتىق پورتالى
