مەسسەندجەرلەر مەن الەۋمەتتىك جەلىلەردە قر پرەزيدەنتى قاسىم-جومارت توقاەۆتىڭ مەكتەپ وقۋشىلارىنا قاتىستى بىلدىرگەن مالىمدەمەسى كەڭ تاراپ جاتىر.
وندا “وقۋشىلار مەكتەپتە ىستىق تاماقتى تەگىن ىشەدى، مەكتەپكە بارىپ-قايتۋ جولاقىسى، سونداي-اق، مەكتەپ فورماسى مەن وقۋ قۇرالدارى تەگىن بولادى. مۇنىڭ ءبارى مەملەكەت ەسەبىنەن” - دەلىنگەن. توقاەۆ ايتتى دەپ تاراپ جاتقان مالىمدەمەگە فاكتچەك جاساپ كوردىك.
ۇكىم: جارتىلاي شىندىق جانە مانيپۋلياتسيا
اقوردانىڭ رەسمي سايتىندا، راسىمەن 2019 جىلى 20 جەلتوقساندا مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ ەكىنشى وتىرىسىندا ايتقان ءسوزى: “مەكتەپ جاسىنا دەيىنگى بالالار ازىق-تۇلىكپەن جانە ەڭ قاجەتتى دەگەن قۇرال-جابدىقتارمەن قامتىلادى. وقۋشىلار مەكتەپتە ىستىق تاماقتى تەگىن ىشەدى، مەكتەپكە بارىپ-قايتۋ جولاقىسى، سونداي-اق، مەكتەپ فورماسى مەن وقۋ قۇرالدارى تەگىن بولادى”، - دەپ بەرىلگەن.
الايدا بۇل 2 جىل بۇرىن جاريالانعان ەسكى اقپارات.
ايتا كەتەتىن ءجايت، مەكتەپتەردە وقۋشىلاردى تەگىن تاماقپەن قامتاماسىز ەتۋ جەرگىلىكتى بيۋدجەتتەن قارجىلاندىرىلادى. قولدانىستاعى زاڭناماعا سايكەس پرەزيدەنت تاپسىرما بەرگەنىمەن، سوڭعى شەشىمدى جەرگىلىكتى ءماسليحاتتار شەشەدى. اكىم ۇسىنىس ەنگىزىپ، ءماسليحات شەشىم شىعارادى.
پرەزيدەنت ايتتى دەپ تاراپ جاتقان مالىمدەمەگە جاسالىنعان فاكتچەك قورىتىندىسى بويىنشا، بۇل 2 جىل بۇرىن ايتىلعان اقپارات جانە ونى قازىر تاراتۋعا ەش نەگىز جوق.
زارينا اشىربەك،
"ادىرنا" ۇلتتىق پورتالى
