26 قاڭتاردا قاراعاندى وبلىسىنىڭ اكىمى جەڭىس قاسىمبەك ءوزىنىڭ فەيسبۋك الەۋمەتتىك پاراقشاسىندا 2021 جىلدىڭ قورىتىندىسى بويىنشا وڭىردەگى تۇرعىن ءۇي قۇرىلىسى جانە تۇرعىن ۇيلەردى پايدالانۋعا بەرۋ كورسەتكىشى جايىندا بىرنەشە دەرەك كەلتىردى. اكىم جازعان فاكتىلەردىڭ قانشالىقتى راس ەكەنىن تەكسەرىپ كورەيىك.
“قارجىلاندىرۋدىڭ بارلىق كوزدەرى ەسەبىنەن ءبىز 662 مىڭ م² تۇرعىن ءۇيدى پايدالانۋعا بەردىك. بۇل شامامەن جەتى مىڭ پاتەر”.
ۇكىم: شىندىققا جاقىن
قاراعاندى وبلىسى اكىمدىگىنىڭ رەسمي سايتىندا 25 قاڭتار كۇنى قاراعاندى وبلىسىنىڭ قۇرىلىس، ساۋلەت جانە قالا قۇرىلىسى باسقارماسىنىڭ باسشىسى ابزال جايلىباەۆ “2021 جىلى «نۇرلى جەر» مەملەكەتتىك باعدارلاماسى بويىنشا وبلىستا بارلىق قارجىلاندىرۋ كوزدەرى ەسەبىنەن 662 مىڭ شارشى مەتر تۇرعىن ءۇي پايدالانۋعا بەرىلدى. بۇل شامامەن 7 مىڭ پاتەر”- دەگەن دەرەك كەلتىرەدى.
الايدا ۇلتتىق ستاتيستيكا بيۋروسىنىڭ رەسمي مالىمەتىنە سايكەس، ەڭ كەيىنگى دەرەك 2021 جىلدىڭ 21 جەلتوقسانىندا جاريالانعان اقپاراتقا ساي، تۇرعىن ءۇيدى پايدالانۋعا بەرۋ كورسەتكىشى 2021 جىلعى قاڭتار-قاراشادا جالپى الاڭى 508,2 مىڭ شارشى مەتردى قۇراسا، بارلىق مەنشىك نىسانىنداعى ۇيىمدار 4543 پاتەر سالعان.
ودان بولەك، ستاتيستيكا بيۋروسىندا 2021 جىلدىڭ 23 جەلتوقسانىندا جاريالانعان اقپاراتقا سايكەس، ءار اي سايىن قانشا مىڭ شارشى مەتر تۇرعىن ءۇي پايدالانۋعا بەرىلگەنى جايلى دەرەك انىق-قانىق كەلتىرىلگەن. م.: قاڭتار (57 859), اقپان (34 452), ناۋرىز (54 441), ءساۋىر (13 416), مامىر (34 057), ماۋسىم (19 789), شىلدە (57 486), تامىز (36 470), قىركۇيەك (88 615), قازان (71 270), قاراشا (40 380), جەلتوقسان ايى (-). بارلىعىن قوسقاندا: 508 235 م².
وبلىس اكىمى كەلتىرىپ وتىرعان 662 مىڭ م² بولعاندا، جەلتوقسان ايى بويىنشا - (153 765) بولۋى كەرەك ەدى. ستاتيستيكا بيۋروسىنىڭ رەسمي اقپاراتىندا سوڭعى جەلتوقسان ايى بويىنشا بۇل كورسەتكىش كورسەتىلمەگەن.
اكىم جازباسىنا جۇرگىزىلگەن فاكتچەك قورىتىندىسى بويىنشا، ۇلتتىق ستاتيستيكا بيۋروسىندا تۇرعىن ءۇيدى پايدالانۋعا بەرۋ تۋرالى 2021 جىلدىڭ تولىق كورسەتكىشى ءالى جاريالانباعاندىقتان، ۋاقىت ارالىعىنداعى كورسەتكىش وزگەرىسىن سالىستىرۋ مەتودولوگيا تۇرعىسىنان دۇرىس ەمەس.
زارينا اشىربەك،
"ادىرنا" ۇلتتىق پورتالى
