ءومىر ءار ساتكە قالاي جاۋاپ بەرەتىنىمىزدەن تۇرادى. ستيۆەن كوۆيدىڭ ايتۋىنشا، ومىردە قانداي جاعدايعا تاپ بولعانىمىز ەمەس، سول جاعدايعا قالاي جاۋاپ قاتاتىنىمىز ماڭىزدى.
رەاكتيۆ ادامدارعا سىرتقى جاعداي قاتتى اسەر ەتەدى، ال پرواكتيۆ ادامداردىڭ ءىس- ارەكەتىنە جان-جاقتى ويلاستىرىلعان ءارى بويعا سىڭگەن قۇندىلىقتار اسەر ەتەدى. دەمەك، رەاكتيۆ ادامعا سىرتقى جاعداي، ايتالىق «اۋا رايى» اسەر ەتۋى مۇمكىن، ال پرواكتيۆ ادامنىڭ ءوز اۋا رايى ءوز ىشىندە.
سونىمەن قاتار پرواكتيۆ بولۋ ءۇشىن ءبىزدىڭ قولىمىزدان كەلەتىن بىردەن-ءبىر نارسە – ءوز تىلىمىزگە كوڭىل ءبولۋ جانە كىنانى وزگەگە اۋدارا سالاتىن رەاكتيۆ ءتىلدى ەمەس، جاۋاپكەرشىلىك الاتىن پرواكتيۆ ءتىلدى قولدانۋ بولماق.
👎 رەاكتيۆ ءتىل: ول مەنى ماجبۇرلەدى. مەنىڭ بولمىس-ءبىتىمىم وسىنداي. ەش نارسە قولىمنان كەلمەيدى. ەگەر قولىمنان كەلسە عوي...
👍 پرواكتيۆ ءتىل: ءوز ءومىرىم ءوز قولىمدا. ءوز رەاكتسيامدى باقىلاي الامىن. تاڭداۋ قۇقىعىم بار. مەنىڭ قولىمنان كەلەدى.
رەاكتيۆ ادامدار كوبىنە ىرقىنان تىس، ەندى وزگەرتە المايتىن دۇنيەلەرگە، ايتالىق، وتكەن شاققا باس قاتىرادى. «دۇرىس وقىعانىمدا...»، «مىنا شارۋامەن جاستايىمنان اينالىسۋىم كەرەك ەدى...» سودان بارىپ قۇرباندىق سەزىمى پايدا بولادى. ءيا، ءبىز قاتەلەسۋىمىز مۇمكىن، بىراق پرواكتيۆتى ادامدار قاتەلىگىن ءوز-ءوزىن اقتاپ الۋ ءۇشىن ەمەس، سول قاتەلىكتەن ساباق الۋ ءۇشىن پايدالانادى.
ماسەلەن، رەاكتيۆ ادامداردىڭ ويى سان ءتۇرلى «بولسادان» تۇرادى: ءۇيىم بولسا، جاناشىر باسشىم بولسا، عىلىمي دارەجەم بولسا... مەن باقىتتى بولار ەدىم.
ال پرواكتيۆ ادامداردىڭ ويى “بولا الامىننان” تۇرادى: مەن ءتوزىمدى بولا الامىن، پاراساتتى بولا الامىن، سۇيىكتى بولا الامىن... كوۆي «بولا الامىن» دەۋ ءۇشىن مىنەز كەرەك دەيدى.
پرواكتيۆ بولۋ ءۇشىن مىنانى ۇسىنادى: ءوزىڭىزدىڭ دە، وزگەلەردىڭ دە الدىندا شاعىن مىندەتتەمە الىڭىز جانە سونى ورىنداڭىز; جازالاۋشى ەمەس، جاسامپاز بولىڭىز; سىنشى ەمەس، ۇلگى بولىڭىز; پروبلەما ەمەس، ونىڭ شەشىمى بولىڭىز.
قورىتا ايتساق، پرواكتيۆ بولۋ دەگەنىمىز:
ءبىزدىڭ كۇشىمىز ءوز جاۋابىمىزدى ءوزىمىز تاڭدايتىن ەركىمىز بەن قابىلەتىمىزدە ەكەنىن ءبىلۋ; باستاماشىل بولۋ; وزىڭە جاۋاپكەرشىلىك الۋ; ومىردە ءبىز باقىلاي الاتىن جانە باقىلاي المايتىن دۇنيەلەر بار ەكەنىن ەسكەرىپ، باقىلاي المايتىنعا قۇر باس قاتىرىپ، الاڭداماي، ىقپال ەتە الاتىن دۇنيەلەرگە كوبىرەك كوڭىل ءبولۋ دەگەن ءسوز.
"ادىرنا" ۇلتتىق پورتالى
