بۇگىندە تۋريزم ەكونوميكانىڭ الەمدە بەلسەندى دامىپ كەلە جاتقان ءبىر سالاسى. سوڭعى بىرنەشە ونجىلدىقتا شەتەلدىك تۋريستەردى تارتۋعا بايلانىستى قارقىندى تۇردە جۇرگىزىلىپ وتىرعان رەفورمالاردىڭ ناتيجەسىندە بىرنەشە ەل ءوز ەكونوميكالارىن الدەقايدا جوعارعى دەڭگەيگە كوتەرىپ الدى دەسە دە بولادى. ەگەر ساندىق-ستاتيستيكالىق مالىمەتتەرگە جۇگىنەر بولساق، تابىسى قوماقتى باسقا سالالارمەن سالىستىرعاندا تۋريزم سالاسىنىڭ سالماعى باسىم ەكەندىگىن ايقىن بايقايمىز. مامانداردىڭ زەرتتەۋىنشە، تۋريزم سالاسى 2005 جىلدان باستاپ جەڭىل اۆتوكولىك پەن مۇناي ەكسپورتتاۋدى ارتتا قالدىرىپ، كىرىس اكەلۋ جاعىنان ءبىرىنشى ورىنعا شىققان، دەپ حابارلايدى "ادىرنا" ۇلتتىق پورتالى.
ءتۋريزمنىڭ ەل ەكونوميكاسىنداعى ىقپالدى ورنى مەن ماڭىزدىلىعى 10-11 اقپان كۇندەرى قازاقستان ينجەنەرلىك-تەحنولوگيالىق ۋنيۆەرسيتەتىندە ورىن العان حالىقارالىق عىلىمي-تاجىريبەلىك ونلاين كونفەرەنتسيادا كەڭىنەن ايتىلدى. «تۋريزم ايماقتىڭ تۇراقتى دامۋ فاكتورى رەتىندە» تاقىرىبىنداعى بۇل عىلىمي باس قوسۋدى قازاقستان ينجەنەرلىك-تەحنولوگيالىق ۋنيۆەرسيتەتى، التاي رەسپۋبليكاسى تابيعي رەسۋرستار، ەكولوگيا جانە تۋريزم مينيسترلىگى مەن تاۋلى-التاي مەملەكەتتىك ۋنيۆەرسيتەتى (رەسەي) بىرلەسە ۇيىمداستىردى. كونفەرەنتسيا جۇمىسىنا قازاقستان مەن رەسەي جوو-لارىنىڭ، عىلىمي-زەرتتەۋ ينستيتۋتتارىنىڭ، مەملەكەتتىك ورگانداردىڭ جانە باسقا دا ۇيىمداردىڭ وكىلدەرى، تۋريستىك يندۋستريا سالاسىنداعى 100-دەن استام عالىمدار مەن ماماندار قاتىستى. كونفەرەنتسيادا ماماندار تۋريزم يندۋسترياسى سالاسىنداعى جالپى الەۋمەتتىك جانە ەكونوميكالىق ماسەلەلەردى شەشۋدە ءبىلىم ساپاسىن ارتتىرىپ، باسەكەگە قابىلەتتىلىكتى كۇشەيتۋ ماقساتىندا تاجىريبە الماستى.
كونفەرەنتسيانىڭ پلەنارلىق ءماجىلىسىنىڭ اشىلۋ سالتاناتىندا قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا جوعارى ءبىلىمنىڭ حالىقارالىق تۋريزم سالاسىنداعى رولىنە توقتالى، الەمدەگى،سونىڭ ىشىندە قازاقستان مەن رەسەيدەگى دامۋ ءۇردىسىنىڭ ءمان-جايىن بايانداپ، وڭىرلىك جانە حالىقارالىق ءتۋريزمدى دامىتۋداعى وزەكتى ماسەلەلەرمەن ءبولىستى.
«ءبىز الەمدەگى ەڭ ادەمى قالالاردىڭ ءبىرى – حالىقارالىق تۋريزم دەڭگەيى جوعارى دامىعان، الماتى قالاسىندا ءومىر ءسۇرىپ، جۇمىس ىستەيمىز. مۇندا تاۋ باسىنداعى «مەدەۋ» مۇز ايدىنى، «شىمبۇلاق» تاۋ-شاڭعى كۋرورتى جانە الەمنىڭ تۇكپىر-تۇكپىرىنەن تۋريستەر كەلەتىن باسقا دا كورىكتى جەرلەر ورنالاسقان. ءتۋريزمنىڭ قولايلى ايماعىندا ورنالاسقان قازاقستان ينجەنەرلىك-تەحنولوگيالىق ۋنيۆەرسيتەتى ىنتىماقتاستىق ءۇشىن اشىق جانە تۋريزم يندۋسترياسى سالاسىندا وڭىرلىك يننوۆاتسيالىق-ءبىلىم بەرۋ كلاستەرى بولۋعا دايىن» - دەدى.
وتاندىق جانە شەتەلدىك ماماندار تاراپىنان كونفەرەنتسيا بارىسىندا وزەكتى تاقىرىپتار قوزعالىپ، ۇتىمدى ويلار ايتىلدى. وسى تۇستا تاقىرىپقا قاتىستى باياندامانى رەكتوردىڭ مىندەتىن اتقارۋشى، قۇقىق، فيلوسوفيا جانە الەۋمەتتانۋ كافەدراسىنىڭ دوتسەنتى، يۋنەسكو-نىڭ «تاۋلى اۋماقتاردىڭ تۇراقتى دامۋى» كافەدراسىنىڭ مەڭگەرۋشىسى ۆ.و.نەدەلسكي جالعاستىرىپ، تۋريزم سالاسىنىڭ دامۋىنداعى ءتۇيىندى ماسەلەرگە توقتالىپ، كادر دايارلاۋدا العا قويىلاتىن نەگىزگى ماقساتتاردى باياندادى.
ەكى كۇنگە سوزىلعان ونلاين-كونفەرەنتسيا ناتيجەسىندە تۋريستىك يندۋستريا سالاسىن دامىتۋ، تۋريستىك الەۋەت ءتى ارتتىرۋدا وقىتۋشىلىق قۇرامنىڭ ءبىلىم مەن جۇمىس تاجىريبەسىنىڭ دەڭگەيىن جەتىلدىرۋ قاراستىرىلدى. ساپالى ءبىلىم بەرۋ ناتيجەسىندە بىلىكتى مامان دايارلاۋعا جولدارى ايقىندالىپ، العان جەتىك تاجىريبەنى ءبىلىم بەرۋ پروتسەسىندە ءتيىمدى قولدانۋ ۇسىنىلدى.
"ادىرنا" ۇلتتىق پورتالى
