گۇلنارا كاريموۆانىڭ قىلمىستىق جولمەن جيناعان 10 ميلليون دوللارى فرانتسيادان وزبەكستانعا قايتارىلدى. بۇل اقپاراتتى وزبەكستان ادىلەت مينيسترلىگى حابارلادى، بىراق قاشان، قاي كۇنى قايتارىلعانىن ايتپادى. اقپاراتتى ازاتتىقتىڭ وزبەك رەداكتسياسى جاريالادى.
وزبەكستان ادىلەت مينيسترلىگىنىڭ سوزىنشە، "2020 جىلى مامىر ايىندا دا گۇلنارا كاريموۆاعا تيەسىلى 10 ميلليون دوللار قايتارىلعان. قازىر شۆەيتساريا، اقش، فرانتسيا، رەسەي جانە وزگە دە ەلدەردىڭ بيلىگى مەن وزبەك بيلىگى وزبەكستاننان قىلمىستىق جولدارمەن زاڭسىز شىعارىلعان اقشانى قايتارۋ بويىنشا بەلسەندى جۇمىس جۇرگىزىپ جاتىر".
وزبەكستان مەن شۆەيتساريا اراسىنداعى كەلىسسوزدىڭ ءبىر ساتىسى 11 اقپاندا وتكەن. "ەكى تاراپ بىرىككەن ۇلتتار ۇيىمىنىڭ كوپ جاقتى تراست قورىن قۇرۋعا ۋاعدالاستى. قوردىڭ جۇمىسى گۇلنارا كاريموۆاعا بايلانىستى قىلمىستىق ءىس بويىنشا تاركىلەنگەن اكتيۆتەردى قايتارۋعا باعىتتالادى. تەك كاريموۆا ەمەس، وزگە دە تاركىلەنگەن اكتيۆتەرمەن جۇمىس ىستەيدى. قازىرگى ۋاقىتتا 131 ميلليون دوللار اقشا وزبەكستانعا قايتارىلۋعا دايىن تۇر، - دەيدى وزبەكستان ادىلەت مينيسترلىگى.
قوردى باسقارۋ مەحانيزمى شۆەيتساريا، وزبەكستان جانە بىرىككەن ۇلتتار ۇيىمىنىڭ وكىلدەرىنەن قۇرالادى. وسىلايشا، شۆەيتساريا مەن وزبەكستان اۆتيۆتەردى قايتارۋعا كىرىسەدى.
ادىلەت مينيسترلىگىنىڭ سوزىنشە، گۇلنارا كاريماوۆا جونىندەگى وزبەك سوتتارىنىڭ ۇكىمدەرىن ماسكەۋ قالالىق سوتى مويىنداعان، سول سەبەپتى رەسەي دە كاريموۆانىڭ تاركىلەنگەن اكتيۆتەرىن ساتۋدى ۇيىمداستىرىپ جاتىر.
گۇلنارا كاريموۆانى تاشكەنت سوتى 2020 جىلى 18 ناۋرىزدا 13 جىل 4 ايعا سوتتاعان. وعان "قاستاندىق جاساماق بولدى، بوپسالادى، ۇرلىق جاسادى، اقشا جىلىستاتتى" دەگەن ءتۇرلى ايىپتار تاعىلعان. وزبەكستاندى كوپ جىل باسقارىپ، اياق استىنان قايتىس بولعان اۆتوكرات يسلام كاريموۆتىڭ قىزى گۇلنارا كاريموۆا اكەسى ءتىرى كەزىندە-اق تاشكەنت وبلىسىنداعى ايەلدەر كولونياسىنا قامالعان.
بيىل قاڭتار قىرعىنان كەيىن قازاقستان پرەزيدەنتى قاسىم-جومارت توقاەۆ بىرنەشە مالىمدەمە جاساپ، ۇكىمەتكە قازاقستاننان شەتەلگە زاڭسىز شىققان قارجىنى قايتارۋدى تاپسىرعان.
"قاڭتار قىرعىنىنان" كەيىن قازاقستاننىڭ بۇرىنعى پرەزيدەنتى نۇرسۇلتان نازارباەۆ "قاۋىپسىزدىك كەڭەسىنىڭ توراعاسى" وكىلەتىنەن ايىرىلىپ، تۋىستارى جوعارى قىزمەتتەرىنەن بوساعان. وسىدان كەيىن نۇرسۇلتان نازارباەۆتىڭ اينالاسىنداعى ادامداردىڭ شەتەلگە "زاڭسىز شىعارعان اقشاسىن قايتارۋ" جونىندە قوعام بەلسەندىلەرى ءسوز ەتە باستاعان ەدى.
