بيىل ۇلى جازۋشى مۇحتار اۋەزوۆتىڭ 125 جىلدىعىن اتاپ ءوتۋ اياسىندا قازاق راديوسىنىڭ اۋە تولقىنىنان «اباي جولى» رومان-ەپوپەياسىنىڭ اۋديونۇسقاسى بەرىلەدى.
اۋديوكىتاپ فورماتىنداعى حابار ناۋرىز ايىندا باستالىپ، قىركۇيەك ايىنا دەيىن جالعاسادى. بۇل تۋرالى «قازاق راديولارى» جشس باس رەدكاتورى- «قازاق راديوسى» راديوارناسىنىڭ ديرەكتورى دۋلات ابيبۋللاەۆ فەيسبۋك جەلىسىندەگى پاراقشاسىندا جازدى.
«ۇلى پروزايك مۇحتار اۋەزوۆتىڭ دۇنيەگە كەلگەنىنە بيىل 125 جىل. وسىعان وراي تىڭداۋشىلارعا 2 ناۋرىزدان باستاپ «اباي جولى» رومان-ەپوپەياسىن ۇسىنامىز. «كوكجيەك» حابارى اپتاسىنا 7 كۇن، ساعات 21.00 دە ەفيرگە شىعادى. كىتاپتى قازاق راديوسىنىڭ بەلگىلى ديكتورى امانجان سەرىكوۆ دىبىستاعان»،- دەپ جازدى راديوارنا باسشىسى.
«اباي جولى» ەپوپەياسى مۇحتار اۋەزوۆتىڭ الەمگە ايگىلى تاريحي روماندار توپتاماسى، قازاق حالقىنىڭ تۇڭعىش ەپوپەياسى. ول 1942 جىل مەن 1956 جىلدار ارالىعىندا جازىلىپ، جارىققا شىقتىۇ. ەپوپەيانىڭ «اباي» اتانعان العاشقى ەكى كىتابىنا كسرو مەملەكەتتىك سىيلىعى (1949), «اباي جولىنىڭ» تۇتاس ءتورت تومىنا “لەنيندىك سىيلىق”(1959) بەرىلگەن.
ايتا كەتۋ كەرەك، بۇعان دەيىن قازاق راديوسىنىڭ ەفيرىنەن تاۋەلسىزدىكتىڭ 30 جىلدىعىنا وراي ءىلياس ەسەنبەرليننىڭ «كوشپەندىلەر» تريلوگياسىنىڭ اۋديونۇسقاسى, سونداي-اق، تاحاۋي احتانوۆتىڭ «بوران»، حامزا ەسەنجانوۆتىڭ «اقجايىق»; جازۋشى ءازىلحان نۇرشايىقوۆتىڭ «ماحاببات، قىزىق مول جىلدار» روماندارى مەن پرەزيدەنت وقۋعا ۇسىنعان كىتاپتار تىزىمىندەگى جۇسىپبەك ايماۋىتوۆتىڭ «اق بىلەك»; ءابىش كەكىلباەۆتىڭ «ۇركەر»; قاليحان ىسقاقتىڭ «قوڭىر كۇز ەدى»; ساكەن ءجۇنىسوۆتىڭ «اقان سەرى»; بەردىبەك سوقپاقباەۆتىڭ «مەنىڭ اتىم قوجا»; ءسابيت مۇقانوۆتىڭ «بالۋان شولاق»; شەرحان مۇرتازانىڭ «بەسەۋدىڭ حاتى»; مۇحتار ماعاۋيننىڭ «ءبىر اتانىڭ بالالارى» ەڭبەكتەرى مەن ت. الىمقۇلوۆتىڭ اڭگىمەلەرى دە اۋديوكىتاپ فورماتىندا اۋە تولقىنىنان بەرىلگەن.
“ادىرنا” ۇلتتىق پورتالى
