تيكەتون - قازاقستاننىڭ مادەنيەت، ونەر جانە سپورت سالاسىنداعى سىيلىعى داۋىس بەرۋ ناتيجەلەرىن جاريالادى. ناتيجەسىندە ديماش قۇدايبەرگەن "قازاقستاننىڭ جىل ءارتىسى" نوميناتسياسىنىڭ جەڭىمپازى اتاندى. بۇل تۋرالى dimashnews.com سايتى جازدى، دەپ حابارلايدى "ادىرنا" ۇلتتىق پورتالى.
ماسەلەن، كونتسەرتتىك قىزمەت بولىمىندە "قازاقستاننىڭ جىل ءارتىسى" نوميناتسياسىنىڭ شورت-پاراعىنا ديدجەي يمانبەك، حيپ-حوپ ورىنداۋشىسى The Limba, "يرينا كايراتوۆنا" شىعارماشىلىق بىرلەستىگى، ازىلكەش ساۋلە يۋسۋپوۆا، ءارتىس ەۆگەني چەباتكوۆ، Ninety One توبى، ءانشى Yenlik جانە مۋزىكانت ديماش قۇدايبەرگەن كىردى.
“قازاقستاننىڭ جىل ءارتىسى» نوميناتسياسىنىڭ جەڭىمپازى جانە جالپى داۋىس سانى بويىنشا “6 وكتاۆا” يەسى ديماش قۇدايبەرگەن اتاندى.
ايتا كەتەيىك، بۇل ءانشىنىڭ يەلەنگەن العاشقى "تيكەتون" سىيلىعى ەمەس. بۇعان دەيىن وتكىزىلگەن سايىستاردا دا ديماش ءبىرىنشى ورىننان كورىنگەن ەدى.
"ادىرنا" ۇلتتىق پورتالى
