15 ناۋرىزدا تالدىقورعاندا سوت وتىرىسى ءوتىپ، بيولوگيا ءپانىنىڭ مۇعالىمىنە بالاعات سوزدەر ايتقان وقۋشىنىڭ اناسىنا ايىپپۇل سالىندى، دەپ حابارلايدى "ادىرنا" ۇلتتىق پورتالى azattyq-ruhy.kz-كە سىلتەمە جاساپ.
بارشا جۇرتتىڭ جاعاسىن ۇستاتقان جاعداي 11 ناۋرىزدا تالدىقورعانداعى No4 مەكتەپتە ۆيدەوعا ءتۇسىپ قالعان بولاتىن. 9-سىنىپ وقۋشىسى بيولوگيا ساباعىندا دورەكى سوزدەر ايتىپ، ايەل مۇعالىمگە ايعايلادى. وسى وقيعادان سوڭ مۇعالىم پوليتسياعا ارىزدانعان.
قۇقىق بۇزۋشىنىڭ ورنىنا وقۋشىنىڭ اناسى جاۋاپ بەرۋگە كەلگەن. زاڭ اتا-انانىڭ بىرەۋىنە بالاعا جاۋاپتى تۇلعا رەتىندە ارەكەت ەتۋگە مۇمكىندىك بەرەدى. ۇلىن تاربيەلەۋ جونىندەگى مىندەتتەرىن ورىنداماعانى ءۇشىن اناسىنا قر اقبتك-ءنىڭ 3-بولىگىنىڭ 127-بابى «كامەلەتكە تولماعان بالانى تاربيەلەۋ جونىندەگى مىندەتتەردى ورىنداماۋ» بويىنشا 42 مىڭ تەڭگە ايىپپۇل سالىندى.
ايەل مۇعالىمنەن كەشىرىم سۇراپ، ۇلىنىڭ ۇستامدىلىق تانىتپاعانىنا قىنجىلاتىنىن ءبىلدىردى.
«انا رەتىندە ءسىزدى تۇسىنەمىن، كەشىرەمىن، بىراق ۇستاز رەتىندە مەن قاتتى قورلاندىم. ۇستاز مارتەبەسى اياققا تاپتالدى»، - دەدى مۇعالىم سوتتا.
سىنىپتا بولعان جاعدايعا وقۋشىنىڭ اناسى تىكەلەي كىنالى بولماسا دا، ونىڭ ارەكەتىندە اكىمشىلىك قۇقىقبۇزۋشىلىق قۇرامىنىڭ وبەكتيۆتىك جاعى بار، ياعني ول بالاسىنا دۇرىس تاربيە بەرە الماعان. وقۋشىنىڭ بارلىق سىنىپتاسىنىڭ الدىندا وسىنداي مىنەز-قۇلىققا جول بەرگەنىن ەسكەرسەك، بالا تاربيەسىندە ۇلكەن ولقىلىقتار بولعانىن ايتۋعا بولادى.
ەسكە سالساق، وقۋشى 14 ناۋرىزدا قر اقبتك-ءنىڭ 434-بابىنىڭ 1-بولىگى «ۇساق بۇزاقىلىق» بويىنشا جازاعا تارتىلىپ، 5 اەك كولەمىندە ايىپپۇل سالىندى. بالانىڭ جۇمىس ىستەمەيتىنىن جانە تابىسىنىڭ جوق ەكەنى ەسكەرىلىپ، ول ايىپپۇل دا اناسىنىڭ موينىنا جۇكتەلدى.
"ادىرنا" ۇلتتىق پورتالى
