بەلگىلى اقىن، قر پارلامەنتى ءماجىلىسى دەپۋتاتى قازىبەك يسا جاڭا جىل - بارىس جىلىنىڭ العاشقى كۇندەرى الەمگە ايگىلى جازۋشى-دراماتۋرگ دۋلات يسابەكتى “اق جول” پارتياسىنىڭ الاش ارىستارى قۇرمەتىنە ارناپ شىعارعان “قازاق رەسپۋبليكاسىنا 100 جىل” التىن مەدالىمەن ماراپاتتادى.
“بورتە” دراماسى ءۇشىن رەسپۋبليكالىق “قازاق ءۇنى” ۇلتتىق پورتالى-گازەتىنىڭ ءداستۇرلى “جىل ادامى” - “جىل دراماتۋرگى” نوميناتسياسىن تاپسىردى.
-دۋلات يسابەك اعامىز “بورتە” دراماسى ءۇشىن رەسپۋبليكالىق “قازاق ءۇنى” ۇلتتىق پورتالى-گازەتىنىڭ ءداستۇرلى “جىل ادامى” - “جىل دراماتۋرگى” تاڭداۋىن باسىم داۋىسپەن جەڭىپ الدى،-دەدى قازىبەك يسا قۇتتىقتاۋ سوزىندە.
- ءبىز استانادا “بورتە” سپەكتالىنە بيلەت الۋ ءۇشىن مينيسترگە دەيىن شىعۋعا تۋرا كەلىپ، زورعا تاپتىق. ال ەكى كۇن وتكەن پرەمەرانىڭ ەكىنشى كۇنى ءبىر كاسىپكەر جىگىتتەردىڭ “100 مىڭ تەڭگەگە بولسا دا ەكى بيلەت تاۋىپ بەرىڭدەرشى” دەگەنىن ەسىتتىك ەلدەن. تەاترعا كىرۋ بيلەتىنىڭ مۇنداي كوپ ەسەلەنىپ كوتەرىلگەنىن ءبىرىنشى رەت كوردىك.
“بورتە” - الەم نازارىن اۋدارىپ وتىرعان ۇزدىك دراما. باستى ەرەكشەلىگى - الەمدى بيلەگەن قاھارلى شىڭعىس حانعا قۇندى كەڭەستەر بەرىپ، كەرەك كەزىندە كەمشىلىگىن دە بەتىنە ايتا العان جالعىز ادام - تورتكۇل دۇنيەنى بيلەگەن ءتورت ۇلىنىڭ اناسى - بورتەنىڭ قايسارلىعى مەن دانىشپاندىعى، ياعني قازاق ايەلىنىڭ ۇزدىك كوركەم شىعارمانىڭ باستى كەيىپكەرىنە اينالۋى.
بۇل دراما قازىر بىرنەشە ەل ساحناسىنا دايىندالىپ جاتىر. كەزىندە جارتى الەمدى جاۋلاعان شىڭعىس حان قىلىشىمەن جەتپەگەن جەرگە بورتە جەتتى دۋلات يسابەكتىڭ قالامىمەن!-دەدى اقىن قازىبەك يسا.
ءبىرتۋار تۇلعا، ارداقتى اعامىز دا ءىنىسى قازىبەك يسانى “ادىرنا” ۇلتىق پورتالى ۇيىمداستىرعان فەيسبۋكتىڭ ميلليونعا جۋىق جازىلۋشىسى بار 7 توبىنداعى جالپىحالىقتىق داۋىس بەرۋدە ““جىل ادامى” - “جىلدىڭ ۇزدىك دەپۋتاتى” اتانۋىمەن ارنايى قۇتتىقتاپ، قۇرمەتتەپ شاپان جاپتى!
-قازىبەك يسا پارلامەنتكە وزگەرىس اكەلدى. ۇلتتىق مۇددەنى قورعاپ، ساڭقىلداپ شىعىپ جاتقان دەپۋتاتتىق ساۋالدارى ەلدىڭ مۇڭىن جەتكىزۋىمەن جانە شەشەن تىلدە وتكىر ايتىلۋىمەن ەرەكشەلەنىپ وتىر. جالپى، حالىق ءۇنىن جەتكىزىپ، قايرات تانىتىپ وتىرعان “اق جول” پارتياسىنا اق جول تىلەيمىن”-دەدى دۋلات يسابەك
ءدۇلدۇل قالامگەر دۋلات يسابەكتىڭ بيىل كۇزدە تولاتىن 80 جاس مەرەيتويىن اتاپ وتۋگە كوپتەگەن ەلدەر ىقىلاس بىلدىرۋدە.
ازامات تاسقاراۇلى،
"ادىرنا" ۇلتتىق پورتالى
