«ەۆروپا پليۋس قازاقستان» راديوسىنىڭ جۇرگىزۋشىسى ليۋبوۆ پانوۆا Facebook پاراقشاسىندا «ۆوۆا اعامدى كومەككە شاقىرامىن» دەپ جازعان پىكىرىنە بايلانىستى جۇمىسىنان بوساتىلدى. بۇل تۋرالى راديوستانتسيانىڭ Instagram پاراقشاسىندا حابارلاندى، دەپ جازادى "ادىرنا" ۇلتتىق پورتالى.
رەسمي حابارعا سايكەس، ليۋبوۆ پانوۆامەن ەڭبەك قاتىناسى 28 ناۋرىزدان باستاپ توقتاتىلدى.
پانوۆا فەيسبۋكتەگى پاراقشاسىندا رەسەيدىڭ ۋكرايناعا اسكەري باسىپ كىرۋىنە قولداۋ ءبىلدىرىپ، رەسەي ساياساتىمەن كەلىسپەيتىن قازاقستاندىقتاردى "ۇلتشىلدار" دەپ ايىپتاپ، ءسوز اراسىندا "ۆوۆا اعامدى كومەككە شاقىرامىن" دەپ ايتقان. وسىدان كەيىن بىرقاتار الەۋمەتتىك جەلى قولدانۋشىلارى ءوز نارازىلىقتارىن ءبىلدىرىپ، مۇنداي ورەسكەلدىككە جول بەرگەن قىزمەتكەردى «بىزگە قارسى دورەكى سوزدەر ايتىپ، ۇلتارالىق ارازدىقتى قوزدىرعانى جانە سوعىسقا شاقىرعانى ءۇشىن» جۇمىستان شىعارۋدى تالاپ ەتتى.
"ەۋروپا پليۋس قازاقستان" باسشىلىعى پانوۆانىڭ ۇستانىمى "راديوستانتسيا ساياساتىنا ەش قاتىسى جوق" دەپ كوپشىلىككە تۇسىنىكتەمە بەرىپ، قىزمەتكەرىنىڭ ءىسى تارتىپتىك كوميتەتتە قارالاتىنىن مالىمدەدى.
الماتى پوليتسيا دەپارتامەنتى راديوجۇرگىزۋشىنىڭ ۇستىنەن قىلمىستىق ءىس قوزعالعانىن حابارلادى.
اتالعان فاكتى بويىنشا قازاقستان رەسپۋبليكاسى قك-ءنىڭ 174 بابىندا كوزدەلگەن قىلمىس بەلگىلەرىمەن، ياعني ۇلتارالىق الاۋىزدىقتى قوزدىرۋ بويىنشا قىلمىستىق ءىس، سوتقا دەيىنگى تەرگەۋدىڭ بىرىڭعاي تىزىلىمىنە تىركەلگەنىن حابارلايمىن. قىلمىستىق ءىس بويىنشا الدىن-الا تەرگەۋدى وتكىزۋ الماتى قالاسى پوليتسيا دەپارتامەنتىنىڭ تەرگەۋ باسقارماسىنا جۇكتەلدى، - دەپ مالىمدەدى الماتى پوليتسيا دەپارتامەنتى باسشىسىنىڭ ورىنباسارى رۋستام ابدراحمانوۆ.
بۇگىن، ياعني اعىمداعى جىلدىڭ 28 ناۋرىزىندا ءىس بويىنشا ءتيىستى ساراپتامالار تاعايىندالدى، ونىڭ قورىتىندىسى بويىنشا پروتسەسسۋالدىق شەشىم قابىلداناتىن بولادى.
"ادىرنا" ۇلتتىق پورتالى
