مەسسەندجەرلەر مەن الەۋمەتتىك جەلىلەردە الماتىدا “Za روسسيۋ” مۋزىكالىق-پاتريوتتىق مارافونى اياسىندا "ودناجدى ۆ روسسي" شوۋى وتەدى دەگەن اقپارات كەڭ تاراپ جاتىر.
افيشاداعى سۋرەتكە قاراپ: “الماتى قالاسىندا 27 مامىر كۇنى "Za روسسيۋ” مارافونى اياسىندا "ودناجدى ۆ روسسي" شوۋى وتەتىنىن اڭعارۋىمىزعا بولادى. ءبىز بۇل اقپاراتتىڭ راس-وتىرىگىن تەكسەرىپ كوردىك.
ۇكىم: مانيپۋلياتسيا جانە فەيك
مانيپۋلياتسيا مىنادا: ءيا، شىنىمەن دە "ودناجدى ۆ روسسي” شوۋى الداعى كۇندەرى: 18 ءساۋىر پاۆلوداردا، 19 ءساۋىر وسكەمەندە، 22 ءساۋىر شىمكەنتتە، 23 ءساۋىر اتىراۋدا، 25 ءساۋىر اقتاۋدا، 26 ءساۋىر اقتوبەدە، 27 ءساۋىر ورالدا، 26 مامىر نۇر-سۇلتاندا جانە 27 مامىر الماتىدا كونتسەرت وتكىزەدى ەكەن. “Za روسسيۋ” مۋزىكالىق-پاتريوتتىق مارافونىنا كەلەتىن بولساق، اتالمىش ءىس-شارالار لەگى رەسەيدىڭ ۋكرايناداعى ارنايى اسكەري وپەراتسياسىن” قولداۋ ماقساتىندا 5 مامىرعا دەيىن رەسەيدىڭ 30-دان استام قالاسىندا وتكىزىلەدى. ءمان بەرەتىن جايت: مارافون ۇيىمداستىرىلاتىن 30-دان استام قالانىڭ ءبارى - رەسەيدىڭ قالاسى. تىزىمدە الماتى نە بولماسا باسقا قز قالاسى كورسەتىلمەگەن. ەكى بولەك اقپاراتتى “Qazaqeli.ru” دەگەن YouTube-كانالى بۇرمالاپ، مانيپۋلياتسيا بەلگىلەرىن پايدالانعانىن بايقاۋىمىزعا بولادى.
فەيك مىنادا: "ودناجدى ۆ روسسي" شوۋىنىڭ رەسمي سايتىندا نە باسقا دا رەسمي سايتتاردا ولاردىڭ “Za روسسيۋ” مۋزىكالىق-پاتريوتتىق مارافونى اياسىندا كونتسەرت ۇيىمداستىراتىنى جايلى اقپارات جوق. ياعني، رف-سى اۋماعىندا ءوتىپ جاتقان “Za روسسيۋ” مۋزىكالىق-پاتريوتتىق مارافونىنىڭ افيشاسى مەن الداعى كۇندەرى قازاقستاندا وتەتىن “ودناجدى ۆ روسسي” شوۋىنىڭ افيشاسى بىرىكتىرىلىپ، ويدان قۇراستىرىلعان.
زارينا اشىربەك،
"ادىرنا" ۇلتتىق پورتالى
