اتىراۋ قالاسىنىڭ اكىمى - مەيىرىم قالاۋي وعان قارسى اقپاراتتىق شابۋىل ۇيىمداستىرىلعانىن مالىمدەدى. بۇل تۋرالى ول ءوزىنىڭ فەيسبۋك پاراقشاسىندا حابارلادى، دەپ جازادى "ادىرنا" ۇلتتىق پورتالى.
"سوڭعى كۇندەرى مەنىڭ اتىمدى جاريالاپ، ءار ءتۇرلى اقپاراتتى تاراتىپ جاتىر. جاريالانعان ماتەريالدار شىندىققا جاناسپايدى. مەن بۇل تۋرالى العاش رەت 2019 جىلى حابارلاما جاساعان بولاتىنمىن. يندەر اۋدانىنىڭ اكىمى قىزمەتىن اتقارىپ جۇرگەندە وسى تەكتەس اقپاراتتار رەسپۋبليكالىق ەلەكتروندى قۇرالدارىنا شىققاننان كەيىن ءوزىمنىڭ باستاماممەن جۋرناليستەرگە حابارلاسىپ، بارلىق جايتقا وراي تۇسىندىرمە (ratel.kz, azh.kz) بەردىم", - دەپ جازدى مەيىرىم قالاۋي.
سونىمەن قاتار اتىراۋ اكىمى 10 جىل بۇرىن (2012 جىلى) مەملەكەتتىك قىزمەتكە كەلگەنگە دەيىن، مەملەكەتتىڭ تاراپىنان بەرىلگەن جەر تەلىمىن قازىرگى قىزمەتىممەن بايلانىستىرىپ، زاڭسىز ارەكەتتەر جاسالعانىن مالىمدەدى.
"مەن مەملەكەتتىك قىزمەتشى رەتىندە دە قۇقىعىمنىڭ قورعالعانىن قالايمىن. سوندىقتان، ادەيى جالعان اقپارات تاراتىپ جاتىرعانداردىڭ ۇستىنەن (سونىڭ ىشىندە فەيك اككاۋنتتاردان) جاقىن ارادا پوليتسيا دەپارتامەنتىنە ارىز تۇسىرەتىن بولامىن. اقپاراتتىق اعىننىڭ قالاي جاسالاتىنىن جاقسى تۇسىنەتىن مامان رەتىندە ايتارىم، بۇل ادەيى ماعان قارسى ۇيىمداستىرىلىپ وتىرعان شابۋىل. قۇقىقتىق، اشىق قوعام قۇرۋعا نيەتتى بۋىننىڭ وكىلى رەتىندە بارلىعىڭىزدى جالعان اقپاراتقا سەنبەۋگە شاقىرامىن!", - دەپ تولىقتىردى ءسوزىن اتىراۋ قالاسىنىڭ اكىمى.
"ادىرنا" ۇلتتىق پورتالى
