كوككە ۇمتىلعان – كوك كۇمبەز

5425
Adyrna.kz Telegram

جوشى حان كەسەنەسى – قازاق جەرىندەگى كونە ارحيتەكتۋرالىق ەسكەرتكىشتەر قاتارىنا جاتقىزىلادى. ول جەزقازعان قالاسىنان سولتۇستىك-شىعىسقا قاراي 50 شاقىرىم جەردەگى قاراكەڭگىر وزەنى بويىندا ورنالاسقان.

ارحەولوگتار كۇمبەزدە ساقتالعان تاڭبالارعا قاراپ ول نىساندى سالۋعا ءوز زامانىندا جوشىعا باعىنعان رۋ-تايپالاردىڭ ءبارى قاتىسقان دەگەن قورىتىندىعا كەلگەن. ولاردىڭ بولجامىنشا، بۇل كۇمبەزدىڭ نەگىزگى قاڭقاسى جوشى حان قايتىس بولعاننان كەيىن، ارادا ءبىر جىل وتكەندە، ياكي 1228 جىلى تۇرعىزىلعان.

كەسەنە كۇيدىرىلگەن كىرپىش جانە عانىش سەكىلدى مينەرالدى تاستاردان سالىنسا، ال اۋماعى 9,55ح7,25 مەترگە تەڭ. جوشى حان كەسەنەسى قازاق دالاسىنا يسلام ءدىنى جايىلا باستاعان العاشقى جىلداردىڭ كورىنىسىن كوز الدىڭىزعا اكەلەدى. كىرە بەرىسىن قۇبىلاعا قاراتىپ، ءتورت بۇرىشتاپ، توبەسىنە كۇمبەز ورناتقان. كۇمبەزىنىڭ ايشىعى قۇمىرا ۇقساتىپ سالىنعان.

نە بارى 40 جاسىندا قامال بۇزىپ، قىپشاق دالاسىن ۋىسىندا ۇستاعان جوشى جايلى اڭىز كوپ. بىر اڭىزدا، حان ءوز ءولىمىن وسى جەردەن تابادى، اڭ اۋلاپ جۇرگەن كەزدە ءوزى جارالاعان اقساق قۇلان ونىڭ قولىن شايناپ تاستادى دەلىنسە، ەكىنشىسىندە باعىنباعانى ءۇشىن حان ءوز اكەسىنىڭ بۇيرىعىمەن ءولتىرىلدى دەگەن دە بولجام بار.

1982 جىلى ەسكەرتكىش رەسپۋبليكالىق ماڭىزى بار تاريحي جانە مادەنيەت ەسكەرتكىشتەر تىزىمىنە ەنگىزىلسە، 2000 جىلى كەسەنەنى قايتا قالپىنا كەلتىرۋ جۇمىستارى جۇرگىزىلدى.


فوتو: ەربولات شادراحوۆ،

https://nationalgeographic.kz

پىكىرلەر